Kesah Si Badia Eme Penampat (Yohanes 14:16-21)

PEKAN DOA

GEREJA GBKP

WARI II, SENIN 23 SEPTEMBER 2013.

Introitus   :     Kusuruh pagi Penampat si reh i bas Bapa nari ndahi kam. Ia kap Kesah si ncidahken kebenaren Dibata. Adi enggo pagi reh Ia kap si eraksi kerna Aku (Yohanes 15:26).

Ogen        :    Bilangen 24:1-9

Khotbah   :    Yohanes 14:16-21.

Tema        :    Kesah Si Badia Eme Penampat.

LATAR BELAKANG

1.   Sada wari ope wari paskah kalak Yahudi, Yesus ngerana man ajar-ajarNa kerna waktu Yesus lanai ndekah  ibas doni enda, Yesus harus ndahi BapaNa. Itadingken Yesus me ajar-ajarNa ibas doni enda. Erkiteken sie me lit pedah-pedah siibereken Yesus man ajar-ajarNa eme adi keleng kin ate ajar-ajar man Yesus maka ajar-ajar e harus ngikutken kai singgo ipedahken. Sebab keleng ate la saja terjeng ngikutken Yesus ku ja saja Yesus lawes, tapi harus ndalankan kai singgo ipedahkenNa.

2.   Guna ndalanken kai singgo ipedahken Tuhan ibas kegeluhen ajar-ajar tep-tep wari harus naksiken kerna Yesus Anak Dibata ras Mesias singgo ipadanken Dibata, ipetetap Yesus ukur ajar-ajarna alu ngataken Kupindoken man BapangKu gelah isuruhNa penampat sideban eme Kesah sinaksiken kerna kebenaren. Ibas erti kata kegeluhen ajar-ajar ibas doni enda tetap ibas pengepkepen Tuhan, sebab iteh Yesus kegeluhen ajar-ajar melala ndatken tantangen kenca itadingken Yesus.

3.   Penampat sireh eme Kesah Si Badia, tapi doni enda la ngasup ngaloken Kesah Si Badia e, sebab Kesah Si Badia reh ibas Surga nari, emaka doni enda berupaya menggagalkan kerina pendahin Kesah Si Badia. Alu ngataken sie, ate Yesus gelah ajar-ajar meteh lit sada penampat Tuhan man ajar-ajar. Bagepe Kesah Si Badia si ras ajar-ajar la saja terjeng nampati tapi pe mereken sada kebenaren situhu-tuhu, alu bage Kesah Si Badia eme kebenaren e sendiri. Alu bage maka kegeluhen ajar-ajar nggeluh ibas kebenaren, emaka terbedaken nge ajar-ajar Yesus ras doni enda. Bagepe ibas Kesah Si Badia simerupaken Tuhan sendiri nampati ras ngajarken ajar-ajar kerna simehuli ras sibenar singgo iajarken Yesus man ajar-ajar, bagepe ngarak-ngarak ajar-ajar guna ngelakoken simehuli ras sibenar.

4.   Amin gia doni enda la nandai Kesah Si Badia, tapi ajar-ajar ngasup nandai Kesah Si Badia e, sebab ajar-ajar nggeluh ibas persadan ras Ia. Ajar-ajar lit sada pengangkan sipayo kerna Kesah Si Badia. Kesah Si Badia eme pribadi sideban ibas Tuhan nari. Ibas pendahin Kesah Si Badia ibas Yesus maka ajar-ajar ngasup nandai ras ngaloken Ia.

5.  Ketetapen ukur sideban siibereken Yesus eme Yesus tetap ras ajar-ajar la saja ibas doni enda tapi pe ibas kegeluhen sipagin eme nggeluh ras Tuhan. Memang Yesus harus mate, tapi kematen e la ngasup naluken Yesus. Keke Yesus ibas simate nari, Yesus tetap nggeluh, janah pribadi Yesus singgeluh e tetap denga iidah ajar-ajar ope denga Yesus nangkih ku surga. Bagepe erkiteken Yesus eme kegeluhen e sendiri, maka ajar-ajar pe tetap nggeluh amin gia mate pe.

APLIKASI

            Kesah Sibadia eme penampat man banta sitek man Yesus Kristus. Kesah Si badia erdahin khusus man banta gelah kita tetap nggeluh ibas persadan ras Yesus Kristus. Sebab kalak singgeluh ibas persadan ras Yesus Kristus kegeluhenna nggeluh ibas kebenaren ras ersaksi kerna Dibata. Emaka kegeluhen kalak si tek la saja nggeluh ibas doni enda tapi pe nggeluh ras Yesus ibas wari sipepagin.

            Ersaksi kerna kebenaren Tuhan harus teridah ibas kegeluhenta tep-tep wari. Kita ngasup ersaksi erkite-kiteken kita nggeluh ibas persadan ras Yesus Kristus ras nggit mbereken dirinta ipinpin Kesah Si Badia. Jadi gelah kegeluhenta ipasu-pasu Tuhan, kita harus nggeluh ibas kebenaren ras ersaksi kerna Tuhan.

Pdt. Steven Kumenit, STh.M.Min.