Tetap Mejingkat Ibas Kegeluhen (Amsal 10:4-5).

BAHAN PJJ GEREJA GBKP

TANGGAL 8 – 14 SEPTEMBER 2013

KUAN-KUANEN 10:4-5

Tema : Tetap Mejingkat Ibas Kegeluhen.

LATAR BELAKANG

1.      Kegeluhen bangsa Israel lalap ihubungken ras Tuhan, i ja pengangkan bangsa Israel kerna kesuksesan/keberhasilan ibas kegeluhen erkite-kiteken pasu-pasu Tuhan. Emaka guna ndatken pasu-pasu Tuhan e bangsa Israel harus nggeluh patuh ernalem ntah pe ersembah man Tuhan, ras ndalanken kai singena ateNa. Guna sie me raja Salomo mpersingeti bangsa Israel gelah mejingkat ras pentar erdahin.

2.      Memang Tuhan e perkeleng dingen ncukupi kerina kebutuhen-kebutuhen manusia, tapi labo berarti manusia sinik saja, lang. Manusia harus erdahin guna ndatken kebutuhen-kebutuhenna (bd.Kej.3:10), sebab Tuhan nggo nikapken kebutuhen-kebutuhen manusia silit isekelewetna, termasuk nggo nikapken taneh sisubur ras mereken hasil juma simehuli.

3.      Gelah bangsa Israel lebih ngangkai kegeluhen enda, maka raja Salomo mereken nasehat ras kai akibatna. Tujun nasehat enda gelah bangsa Israel banci ertimbang ras tetap milih simehuli. Tapi tentuna guna ndatken simehuli e bangsa Israel harus nggeluh pentar, sebab kepentaren enda me simbaba bangsa Israel ku bas keberhasilan ntah pe kesuksesan nggeluh. Janah adi ngerana kerna kepentaran maka si la banci lang siharus idalanken bangsa Israel eme nggeluh ernalem man Tuhan, sebab kepentaren e rehna ibas Tuhan nari.

4.      Amin gia ibas oratenta raja Salomo la terus terang ngataken kerna ketidaksenangan nandangi kalak simekisat, tapi situhuna adi sinen ibas Kuan-kuanen 6:6-11 bagepe situhuna kerna latar belakang pemikiran Israel, raja Salomo bagepe kalak Israel tuhu-tuhu la senang atena ngenen kalak si mekisat, sebab kalak simekisat mpereh kemusilan. Emaka adi musin rani, haruslah erdahin ula tunduh, sebab adi tunduh berarti buah si lit ibas juma e terlambat rani ntah pe lanai banci rani. Adi la rani berarti la lit siman pangan ntah pe siman dayanken. Sebab buah-buahen, bagepe gule-gulen lit batasna, emaka adi buah ntah pe gule-gulen e nggo tasak haruslah i rani, adi lang maka buah ntah gule-gulen e majik. Bagepe adi musim rani, biasana e paksa sicukup sibuk, emaka sada kemelanken nge adi ibas paksa sisibuk e (harus erdahin guna rani), tapi lit situnduh. Adi bagenda perbahanen sekalak kalak Israel maka kalak Israel e nggeluh ibas kemusilan, sebab kalak Israel mpediat pasu-pasu Tuhan singgo ibereken man bana.

5.      Enda ikataken raja Salomo man bangsa Israel gelah bangsa Israel harus nggeluh mejingkat gelah kegeluhenna ipasu-pasu Tuhan.

APLIKASI

            Salah sada penyebab kita musil eme erkiteken mekisat erdahin. Janah salah sada sipat kalak simekisat erdahin eme nggit “menunda-nunda” pendahin.  Padahal erdahin eme sada pemere Tuhan ras ncidahken maka kita eme kalak sipatuh man baNa. Ipihak sideban erdahin eme sada kehamatan man banta, ntah pe status sosialta banci terangkat. Guna sie me maka la bo nari iakapna mela adi nyogok pe ia ibas muat sada-sadan pendahin (Mis. Guna jadi PNS).

            Erkiteken erdahin eme pemere Tuhan, bagepe sada tanggungjawab, maka harus min kita erdahin alu dem pengataken bujur ras keriahen, sebab kalak sierdahin alu dem pengataken bujur ras keriahen idahikenna dahin e alu tutus ras mejingkat, emaka ipasu-pasu Tuhan me ia. Pasu-pasu Tuhan banci saja arah pengangkatan jabatan, penambahan gaji, keberhasilan ibas juma, keberhasil ibas lapangan pekerjaan siidahiken kita, dat bonus erkiteken prestasinta, rsd. Janah kalak simejingkat erdahin ras nggeluh ibas kepentaren maka kai siidatna arah pendahinna pasti tabungkenna guna masa depanna. Jadi harus sinen mejingkat erdahin eme sada faktor sipenting penentu keberhasilan. Emaka sipenting man banta, khususna man permata ula milih-milih dahin ras ula mekisat erdahin, sebab kai pe dahinta adilah sidahiken alu tutus ras mejingkat pasti ipasu-pasu Tuhan. Enda me siharus lit man anak-anakta gelah berhasil anak-anakta pagi, bagi rusur sitotoken gelah ertuah bayak ia.  

Pdt. Steven Kumenit, STh,M.Min.