Kesetiaan Mpereh Pasu-pasu, Kinilasetiaan Mpereh Ukumen (Amos 7:7-15)

BAHAN KHOTBAH GEREJA GBKP
TANGGAL 15 JULI 2012.
==============================
Introitus : Kerina ibahan Dibata sue ras si ngena ateNa dingen rikutken si enggo itetapkenNa. Tangtangna nari kita enggo ipilih Dibata sabap Ia ersura-sura gelah kita dat bagin i bas kai si enggo jadi sikerajangen Kristus (Epesus 1:11).
Ogen : Epesus 1:3-14.
Khotbah : Amos 7:7-15.
Tema : Kesetiaan Mpereh Pasu-Pasu, Kinilasetiaan Mpereh Ukumen.

LATAR BELAKANG.
1. Kegeluhen bangsa Israel selaku bangsa pilihen Tuhan, siseharusna jadi alat Tuhan mpeseh keselamaten man bangsa-bangsa si deban enggo nggeluh alu erbana-bana. Bangsa Israel lanai mbiar man Tuhan. Erkiteken sie me nembeh ate Tuhan, janah ate Tuhan ngukum bangsa Israel. Emaka guna ngataken penghukumen Tuhan e, Tuhan milih nabi Amos guna mpesehsa man bangsa Israel.
2. Bahan khotbahnta sekali enda lit dua bagin simbelin eme 1). Pengenehenen Amos uga ate Dibata nghukum bangsa Israel gelah bangsa Israel banci nggeluh mehuli ras patuh man Tuhan. Pengenehenen enda isehken Amos man bangsa Israel gelah bangsa Israel meteh kerina e. Jadi pengenehenen enda merupaken simbolisasi Penghukuman Tuhan. Tuhan sangana jemak benang arang. Perlu siteh tukang bangunan tupung sie adi atena bangun sada tembok make “ukuren” benang arang. Benang arang enda me sinentuken entah kin tembok e “lurus ntah lang. Jadi ijenda maksudna ibas sukat enda me ate Dibata ngataken bangsa Israel lanai lurus. Janah perlu pe siteh pengenehenen enda merupaken sipeteluken. 2). Laporan imam Amasia man raja Jerobeam, ngataken nabi Amos sangana erbahan pertakin (nen = provokator) guna ngelawan raja Jerobeam. Bagepe iusir Amasia nabi Amos gelah mulih ku kerajaan Juda. i Judalah nabi Amos ndarami nakan arah nubuatenna. Ijenda akapna (Amasia), nubuat-nubuat nabi Amos ibas rangka ndarami nakan (nen = kepentingen diri sendiri). Ola ernubuat i Betel enda. Ijabab Amos maka ia jadi nabi labo erkiteken pilihenna tapi erkiteken pilihen Tuhan nge. Ibas sekalak singasuhi lembu dingen erpeken batang ara maka idilo Tuhan guna ernubuat. Jadi labo nabi singarapken upah.
3. Harus siteh nabi Amos eme nabi siberasal ibas negara Yehuda nari, tepatna i Tekoa nari, kira-kira 20 KM sebelah selatan Jerusalem. Janah perlu siteh lebe kerna situasi bangsa Israel keseluruhen. Ija bangsa Israel seh ibas pemerintahen raja Salomo sada kerajaan, tapi kenca bangsa Israel ipinpin Rehabeam anak Salomo, bangsa Israel pecah jadi dua kerajaan. Kerajaan Israel selatan terdiri ibas dua suku eme Jehuda ras Benyamin, janah ibu kotana eme Yerusalem, janah enda terkenal alu kerajaan Jehuda. Janah Kerajaan Israel utara siterdiri ibas sepuluh suku bangsa eme kerajaan Israel. Ingan ersembah pe enggo beda. Adi kerajaan jehuda ingan ersembahna i Jerusalem, tapi kerajaan Israel ingan ersembahna eme Batel ras i Dan, alu maksud gelah kalak Israel lanai ersembah i Jerusalem. Jadi Nabi Amos berasal ibas Kerajaan Yehuda ipake Tuhan guna ernubuat i tengah-tengah Kerajaan Israel.
4. Betel la saja ingan ersembah bangsa Israel tapi pe kota raja. Bagepe Amasia la saja imam ibas rumah pertoton tapi pe kepala imam rumah pertoton negara.
5. Ibas imam Amasia mpelawes Amos ibas Betel nari maka ngatakenca kerajaan Israel enggo nulak keselamaten ibas Dibata nari. Padahal adi rukurlah ia maka nubuat nabi Amos e singatakenca Dibata sangana ngukur kegeluhen kiniteken bangsa Israel, maka seharusna ia berintropeksi diri ras jera, emaka ialemi Tuhan nge ia. Tapi enda lang.

APLIKASI
Harus sisadari kenca kita iselamatken Dibata arah Jesus Kristus, ate Dibata kita la saja nggeluh ibas persadan ras Ia, tapi pe ngaloken pasu-pasu ibas Dibata nari. Tapi guna ndatken pasu-pasu ibas Dibata nari sipaling penting siharus sibahan eme mbiar man Tuhan ras ndalanken kai siisura-surakenNa. La lit dalan sideban. Tapi siterjadi eme nterem kalak kristen la mbiar ras la erkemalangan man Tuhan bagepe la ndalanken kai singena ate Dibata. Si lebih ngeri eme, enda kerina terjadi ibas kerina aras kegeluhenta, subuk ibas eragama (ergereja) ras ibas bentuk-bentuk pendahin si lit i tengah-tengah doni enda. Padahal perbahanen sibage eme sada “penyangkalan” kerna kuasa ras keleng atea Tuhan. Adi bagenda nge perbahenen kalak kristen maka labo sialoken pasu-pasu Tuhan tapi penghukumen, subuk arah doni enda bagepe Tuhan. Penghukuman doni tergejap ras sinanami paksa kita nggeluh i tengah-tengah doni enda denga, janah enda iijinken Tuhan, janah penghukumen Tuhan ialoken paksa kerehen Jesus peduakaliken.
Bagepe harus siinget kerehen Jesus Kristus peduakaliken bagi pinangko. Ibas erti kata la siteh katawari Ia reh. Emaka kalak kristen sigenduari “terlena” erbahan dosa enggo banci ngadi. Janah kita sitetap ngelakoken kai singena ate Tuhan tetaplah ndalanken kai simehuli singena ate Tuhan gelah kita tetap ipasu-pasu Tuhan.

Pdt. Steven Kumenit, STh, M.Min.