Tema Kiniersadan Ibas Ngelai (Perbahanen Rasul-Rasul 13:44-48).

BAHAN PJJ GEREJA GBKP
TANGGAL 8 – 14 JULI 2012.
=============================
Perbahanen Rasul-Rasul 13:44-48.

Tema : Kiniersadan Ibas Ngelai.

LATAR BELAKANG
1. Bahan oratenta eme sada turi-turin pelayanen Rasul Paulus i kota Antiokia i Pisidia, tepatna i rumah pertoton paksa wari sabat. Man kalak Jahudi wari sabat eme sada wari sikin ikhususken guna ersembah man Tuhan, janah ibas kebaktin biasana lit pengogen kerna kitab undang-undang Musa ras kitab nabi-nabi, bagepe kenca dung pengogen biasana ibereken kesempaten man ise saja siatena nungkun kerna kegeluhen erkiniteken selaku kalak Jahudi. Ibas kesempaten enda me ipake Rasul Paulus guna mpetandaken kerna Jesus Kristus selaku Mesias ras keselamaten manusia, khususna man bangsa Jahudi. Alu kata sideban Paulus mereken kesaksin kerna kekelengen ras perbahanen Tuhan kerna keselamaten ibas Jesus Kristus man bangsa Jahudi. Ibas Jesus Kristus lit pengalemi dosa ras kemerdekaan ibas dosa nari. Kesaksin Paulus e ndatken respon si postif, emaka isuruhna Paulus mereken kesaksin sekali nari ibas minggu sirehna. Ibas wari sabat berikut e Paulus mereken kesaksin mulihi kerna Jesus Kristus, emaka kenca dung kebaktin nterem kalak Jahudi ras kalak si enggo bengket ku bas agama Jahudi, si mbiar man Tuhan ngikutken Paulus ras Barnabas. Iajuk rasul-rasul e ia kerina gelah tetap nggeluh i bas lias ate Dibata.
2. Kesaksin Paulus kerna Jesus Kristus jadi mbar i belang-belang kota Pisidi, emaka nterem kalak si reh pulung ibas rumah pertoton guna megiken kerna kesaksin (kata Dibata ) Paulus e. Tapi asum idah kalak Jahudi kalak si nterem e, cian atena. Ikatakenna maka kai si ikataken Paulus e la bo tuhu janah igombangina pe rasul e. Tapi alu pang Paulus ras Barnabas ngelawan kalak Jahudi e, nina memang situhuna tangtangna berita keselamaten harus ipeseh man bandu, tapi erkiteken itulakndu, janah la atendu nggeluh ibas kegeluhen situhu-tuhu maka ate kami peseh Kata Dibata e man bangsa-bangsa si deban. Megi kai siikataken Paulus ras Barnabas e, meriah ukur kalak si la nandai Dibata, sila kalak Jahudi jadi tek ras ipujina Dibata.
3. Cian ate siicidahken kalak Jahudi, labo erkiteken kerehen jelma sinterem simegiken kesaksin Paulus, tapi ibalik sie kalak Jahudi erpengakap kai siikataken Paulus e la bo tuhu. Jesus la bo Mesias siipadanken Dibata. Tapi Jesus eme sekalak manusia biasa situbuh arah keluarga sisederhana. Sebab man kalak Jahudi la kap mungkin Mesias siipadanken Dibata reh ibas diri manusia ras ibas keluarga simusil nari. Tuhu lit kuasa Jesus tapi kerina e labo kuasa ibas Dibata nari (band. Markus 3:22). Bagepe kerna keselamaten ibas diri Jesus Kristus e la tuhu, sebab Jesus la bo keke ibas simate nari, tapi mait Jesus i tangko ajar-ajarna (band. Matius 28:11-15).
4. Paulus mpersingeti kalak Jahudi alu makeken kai siikataken nabi Jesaya 49:6. Alu tujun gelah kalak Jahudi metehsa maka Paulus ras Barnabas enggo ipilih Tuhan guna mberitaken Terang ras keselamaten man kalak si la nandai Dibata eme kalak kafir (non Jahudi).
5. Harus siangkai lebe maka kalak si tek, khususna kalak si labo kalak Jahudi eme kalak siterdilo guna ngaloken kegeluhen situhu-tuhu. Jadi labo erkiteken gegeh ras kengasupenna sendiri, tapi pelin-pelin pendilo Tuhan, emaka kenca ibegina kai siikataken Paulus ras Barnabas man kalak jahudi minter kalak enda tek.

APLIKASI
Gereja eme persadan kalak si tek, janah tugas gereja eme ersaksi kerna Jesus Kristus ibas doni enda gelah doni enda jadi tek. Bagepe harus siteh kita selaku gereja eme idilo Tuhan guna ngelai, emaka situhuna amin gia lit bas gerejanta serayan Tuhan ntah pe pengurus-pengurus kategorial ras PJJ, tapi tugas ngelai eme tugasta kerina, ise pe la erdobahen. Alu kata si deban kenca kita tek man Jesus Kristus kita enggo ngaloken gegeh ras erbage-bage pemere Kesah Sibadia guna ngelai Jesus Kristus, subuk ibas lingkungen gereja, bagepe i darat gereja, gelah kalak sideban terkelin.
Ibas erbage-bage talenta (karunia) siibereken Tuhan man banta, ula min turah bas kita cian ate, sebab cian ate banci “menghambat” pelayanen i tengah-tengah gereja Tuhan. Tapi siharus lit bas kita eme nggeluh ibas kiniersadan ibas ngelai. Sebab ibas kita ngelai ras-ras maka siterjadi eme dahin simberat jadi menahang, janah enda jadi kesaksin man kalak sideban kerna kiniersadan situhu-tuhu selaku gereja. Jadi adi siperdiateken kerna bahan ogenta, la kap mehuli adi nggeluh ibas perpecahan ras cian ate sebab la mpereh pasu-pasu man banta. Tapi harus siinget nterem kalak simuas ras melihe nandangi pelayanen gereja ras kerna keselamaten, emaka ibas kita ngelai ras-ras, sipedauh min biak egois ras cian ate ras ngelailah kita erpalasken Kata Dibata maka kalak sideban pasti ngejapken kepuasen ras nggeluh ibas keselamaten, emaka marilah kita ngelai alu kiniteruken ukur ras ibas sada team work.

Pdt. Steven Kumenit, STh, M.Min.