Tema : Kiniteruken Ukur Ibas Perpulungen (Markus 10:42-45).

BAHAN PJJ GEREJA GBKP
TANGGAL 22-28 JULI 2012.
============================
Markus 10:42-45.

Tema : Kiniteruken Ukur Ibas Perpulungen.

LATAR BELAKANG
1. Sijadi oratenta eme kata persinget Jesus man ajar-ajarNa kerna eksistensi sekalak siatena jadi mehaga. Kalak siatena jadi mehaga ia harus nggit ngelai. Bagepe ise atena arah lebe, ia harus jadi suruh-suruhen lebe. Enda me erti mehaga ibas Kinirajan Surga. Enda sengaja ikataken Jesus sebab lit denga ibas ajar-ajar Jesus si salah ngangkai kerna erti nggeluh ibas Kinirajaan Surga (Nen = Jakup ras Johanes , ayat 35).
2. Jakup ras Johanes erpengakap kegeluhen rohani bali kap ras Kinirajaan doni. Adi ibas Kinirajaan doni lit kuasa ras merintah alu rate-ate nandangi rakyatna. Pemimpin tuhu-tuhu jadi tuan nandangi rakyatna, janah rakyat la lit hakna (nen = budak), janah enda me siteridah ibas pemimpin-pemimpin i Palestina, khususna arah sen siberedar. Ibas sen e lit gambar Tiberius siisembah selaku dewa. Bagepe ibas sen tembaga siicetak Herodes Filipus ije lit gembar takal Kaisar, siilengkapi alu tulisen “Dia yang harus disembah”. Paksa sie masyarakat itekan, itindas. Tapi ibas konsep kepemimpinen (mehaga) ras jadi arah lebe eme harus ngelai ras nggit jadi suruh-suruhen, sebab ibas ngelai ras jadi sekalak suruh-suruhen (nen = hamba) maka kegeluhen manusia la terpusat man dirina sendiri (nen = jadi penguasa), tapi man kalak sideban. Janah inti kerina enda eme kekelengen. Enda me siharus jadi gelemen ajar-ajar Jesus. Emaka ibas ibas ajar-ajar Jesus mindo kuasa ntah pe atena jadi pemimpin maka situhuna ajar-ajar la berbeda ras peminpin-peminpin kerajaan doni enda.
3. Persinget Jesus enda terjadi sangana Jesus ibas perdalanen ku Jerusalem, tepatna i Perea. Ate Jesus gelah ajar-ajar ula mementingken diri sendiri sierbahanca ajar-ajar Jesus nggeluh ibas kekerasan, penindasan ras nggeluh alu rate-ate, tapi ate Jesus gelah ibas ajar-ajar lit min biak ngelai, sebab paksa sie nterem kal si la ndatken hakna. Tuhu-tuhu ia nggeluh iteruh kuasa tuanna. Perlu siteh ia jadi budak alu erbage-bage sebab eme 1). Keturunen. 2). Tawanan perang banci ipaksa jadi budak. 3). Erkiteken musil maka idayakenna dirina jadi budak. Ibas situasi bage me ajar-ajar harus ngelai ras nggit jadi suruh-suruhen gelah masyarakat banci terselamatken. Lanai perlu ia jadi budak.
4. Persinget sideban Ipebetehken Jesus kerna erti kerehenNa ibas doni enda. Kerehen Jesus ibas doni enda eme ibas rangka ngelai, amin gia situhuna lit bas Jesus kuasa guna merentah alu rate-ate. Kerehen Jesus ibas rangka manusia nggeluh ibas keselamaten. Sitertaban ibebasken, sisakit ipepalem, simuas ras melihe ibereNa nakan ras inemen, rsd.
5. Bagepe ibas rangka nebusi kerina dosa manusia, nggit Jesus mereken KesahNa. Sienda situhuna la saja ngataken kerna erti ngelai ras jadi suruh-suruhen ibas konsep Jesus man ajar-ajarNa, tapi pe i jenda enggo ipebetehken Jesus kerna kiniseran ras kematenNa man ajar-ajarNa. Sebab enggo iteh Jesus kenca bengket Ia ku Jerusalem maka melala penolaken siujungna Ia harus ipakuken ras mate i kayu persilang.

APLIKASI
Harus siinget kegeluhen ibas gereja sada pihak eme nggeluh ibas persadan ras jadi alat Tuhan guna nehken Berita Si meriah ibas doni enda, tapi ibas pihak sideban gereja eme tanda-tanda Kinirajaan Surga. Ate Dibata ibas gereja teridah min Kinirajaan Surga eme nggeluh ibas kedamen, kemalemen ate ras persadan situhu-tuhu. Emaka kalak singgeluh ibas gereja la banci nggeluh alu rate-ate. Kalak singgeluh ibas gereja lit “aturenna” eme saling mperdiateken sada ras sidebanna, nggeluh sisampat-sampaten ras nggeluh ibas ngelai, rsd. Emaka situhuna kegeluhen kalak kristen la banci nggeluh egois ras mementingken diri sendiri, tapi harus ngukuri kegeluhen jelma sinterem, ntah pe harus nggeluh ibas kiniteruken ukur. Tapi guna ndatken kiniteruken ukur maka kita harus nggeluh ibas kuasa Kesah Si Badia ras harus tetap ngoge Pustaka Si Badia ras ngukurisa suari ras berngi (band. Maz. 1:2), ras tetap berkomunikasi ras Tuhan ibas pertoton, rsd.
Bagepe man banta siipercayaken Tuhan jadi pemimpin ibas gereja, maka jadilah pemimpin simeteruk ukur ras nggit ngelai. Sebab jabatan siibereken Tuhan e ibas rangka gelah anggota gereja banci nggejapken uga kekelengen Dibata. Alu bage anggota gereja banci ngataken bujur man Tuhan ras tetap nggeluh ibas keselamaten.

Pdt. Steven Kumenit, STh, M.Min.