Tema : Kita TinepaNa SimehergaNa (Mazmur 139:13-16)

BAHAN PJJ GEREJA GBKP
TANGGAL 15 – 21 JULI 2012.
===============================
Mazmur 139:13-16.

Tema : Kita TinepaNa SimehergaNa.

LATAR BELAKANG.
1. Sijadi oratenta senda eme sada bagin ibas Mazmur pasal 139. Janah enda merupaken pertoton raja Daud. Ibas pertotonna, Raja Daud ngataken kerna eksistensi Tuhan sinjadiken ras simbentuk Daud, bagepe nggeluh ibas rencana Tuhan. Ibas pertoton enda, tentuna icidahken Daud kerna credo kiniteken. Enda tentu jadi erkiteken penggejapen Daud kerna kuasa ras keleng ate Tuhan siseh man bana. Igejapken Daud, ia nggeluh ibas doni enda, bagepe jadi raja, enda kerina ibas karya Dibata.
2. Ilebe-lebe Dibata kegeluhen Daud labo secara kebetulan, tapi pelin-pelin ibas rencana Tuhan. Maksudna eme secara aktif ras kreatif Dibata terlibat ibas perkembangen kegeluhen manusia. Dibata sendiri simperdiateken sekalak bayi ibas bertin denga, jenari seh ku kegeluhen pagi. Erkiteken sie me Daud ngataken bujur man Tuhan, sebab enda merupaken mujizat simbelin ibas kegeluhen manusia (Daud).
3. Erkiteken manusia (Daud) tinepa Dibata arah bertin nande, maka la lit sada pe ibas manusia siterbuni i lebe-lebe Dibata. Janah kerina manusia lit ibas rancangan Tuhan ras lit tujunna. Ibas rencana Tuhan, ate Dibata la lit manusia sibanci “bene ntah pe mate”, tapi ate Tuhan gelah kerina manusia ibas kegeluhen ras ngikutken sura-suraNa.
4. Amin gia situhuna enda merupaken pertoton pribadi Daud, tapi ijenda icidahken Daud kerna kuasa Tuhan si la ersibar ras simelebihi perukuren manusia. Ibas Dibata njadiken manusia, la lit campur tan ibas manusia nari. Tapi justru manusia la meteh uga ia jadi manusia ras tujun kegeluhenna, bagepe kerna proses kegeluhen manusia sedekah ibas doni enda. Dibata ngenca simeteh kerina enda. Emaka si lit bas manusia eme ngataken bujur ngenca ras tetap ernalem man Tuhan simada kuasa.
5. Pengenalan kerna Tuhan alu mehuli siicidahken Daud, seh pe lit sada perenungan ras pengakun kiniteken kerna ise Tuhan e, erkiteke-kiteken litna sada pengalaman nggeluh Daud.

APLIKASI
Kita enda eme salah sada tinepa Dibata. Bagepe kita enda tinepa Dibata siterulin ras simehergana ibas tinepa-tinepa Dibata sideban. Kita mehuli ras meherga erkite-kiteken kita enda seri ras Dibata (band. Kej 1:26), bagepe perukurenta melebihi perukuren tinepa Dibata sideban. Erkiteken sie ibereken Dibata man banta sada dahin guna njaga ras ngusahai doni ras kerina isina (kej. 1:28).
Erkiteken kita enda tinepaNa tentuna itehNa karakterta. Bagepe seharusna kita harus meteh ise kita ras ise Dibata. Alu bage lit ketergantungenta man Tuhan. Bagepe ibas penggejapenta adi la lit Tuhan singarak-ngarak kita, sia-sia me kegeluhenta i tengah-tengah doni enda. Bagepe erkite-kiteken Tuhan nge maka kegeluhenta lit ibas kemalemen ate. Emaka sewajarna nge kegeluhenta idemi alu ngataken bujur man Tuhan.
Ibas pengangkan kita enda tinepa Dibata, maka lit sada kesimpulen sibanci itarik eme kita enda seri ilebe-lebe Dibata, amin gia situhuna lit bas kita berbedaan fisik ras warna kulit. Tapi amin bage gia ula min erkiteken sie kita lanai nggeluh ibas persadan. Tapi marilah kita nggeluh ibas sikeleng-kelengen. Isamping sie ula min kita ermusuhen sada ras sidebanna tapi marilah kita nggeluh ibas keharmonisan. Sebab kita nggeluh i tengah-tengah doni enda erpalasken sura-sura Tuhan eme nggeluh sikeleng-kelengen ras nggeluh ibas keselamaten.

Pdt. Steven Kumenit, STh.M.Min.