Tema : Tandai Pemere Dibata Silit Ibas Kam (1 Korinti 12:4-7; 14-26).

BAHAN PJJ GEREJA GBKP
TANGGAL 28 JULI – 4 AGUSTUS 2012.
==================================
1 Korinti 12 : 4-7; 14-26.

Tema : Tandai Pemere Dibata Silit Ibas Kam.

LATAR BELAKANG
1. I tengah-tengah perpulungen Korinti enggo terbentuk sada golongan “rohani”. Golongan enda erpengakap maka ia enggo seh ku tingkat kegeluhen sisempurna sebab bas golongan enda lit pemere-pemere Dibata khususna glosolalia (bahasa lidah) ras ernubuat. Janah kalak enda erpengakap kalak silenga dat pemere-pemere Dibata enda (kharisma) berarti ia lenga seh ku tingkat kegeluhen sisempurna. Erkiteken sie perpulungen Korinti mengayak kal guna ndatken karunia e, janah mengabaiken karunia-karunia sideban, padahal melala kal pemere-pemere Dibata (karunia).
2. Pemere-pemere Dibata sipelain-lain e me merupaken perwujudan Kesah Si Badia. Kesah Si Badia nge si erbahanca maka lit karunia-karunia khusus i tengah-tengah perpulungen. Janah fungsi kerina e ibas rangka mbangun kula ni Kristus, emaka pemere-pemere Dibata si lit i tengah-tengah perpulungen ula min erbahanca terjadi perpecahan ntah pe terjadi kelompok-kelompok, tapi harus nggeluh ibas persadan, sebab kerina e saling membutuhkan.
3. Guna lebih menjelasken kerna pemere-pemere Dibata saling membutuhken, Paulus menjelasken man perpulungen Korinti alu make kula manusia. Ibas kula manusia lit anggota-anggotana, janah kerina anggota punya peran ras fungsi masing-masing, bagepe saling membutuhken sada ras sideban, emaka teridah nggeluh harmonis. Enda ipake Paulus gelah perpulungen meteh ras menghargai kerna peranen Kesah Sibadia. Sebab gegeh Kesah Si Badia simpersadaken kerina anggota-anggota si lit.
4. Kepelbagaian si lit la banci mbeneken kegeluhen kiniersadaan, tapi justru kepelbagaian (pemere sipelain-lain) e harus mpeturah saling ketergantungen sada ras sideban, sebab masing-masing lit peranna, janah relasi antar anggota e harus nggeluh.
5. Ibas sada Kesah kerina ipersada. La lit nari siberbeda-beda. Kerina suku bangsa enggo ipersada ibas ikaten Kesah. La lit singatakenca aku kalak Yahudi, aku kalak Yunani, bagepe budak ras kalak merdeka sebab kerina enggo i peridiken ibas peridin si Badia (baptisan kudus), janah ibere minem ibas sada Kesah.

APLIKASI
Siteh maka kita enda kenca ijadiken Tuhan janah itamakenNa ibas doni enda, bagepe idilonaNa kita nggeluh ibas sada gereja lit tujunna ntah pe lit sura-sura Tuhan man banta ? erkiteken lit tujun ras sura-sura Dibata enda me maka ibereken Dibata man banta kengasupen ntah pe pemere-pemere Dibata (nen = talenta, karunia). Tapi sijadi persoalen eme, maka kita terjeng meteh ngenca maka kita enda tinepa Dibata ras kita enda kalak kristen, tapi pemere-pemere Dibata si lit bas kita la bo siteh. Harus siteh lit kepe pemere-pemere Dibata man banta. Memang man piga-piga jelma (anggota gereja) enggo teridah, tapi deba lenga teridah. Bagepe deba ibereken Dibata sada ngenca, tapi deba lebih arah sada. Bagepe lit ka si seri. Tapi sipenting i jenda pemere-pemere Dibata e ertujun guna mbangun kula ni Kristus, bagepe ibas rangka ngelai Tuhan alu patuh. Janah harus ka sigejapken “kelebihen” simerupaken pemere Dibata man banta, labo erkiteken gegehta sendiri, tapi enda kerina pemere Dibata kap. Emaka la banci kita meganjang ukur. Tapi harus meteruk ukur ras nggit kerja sama ras temanta sideban. Sebab kai gunana lit bas kita pemere Dibata tapi la terfungsiken alu mehuli.
Persoalen man banta eme uga carana gelah siteh pemere-pemere Kesah Si Badia (Dibata) si lit bas kita, janah uga ka cara makekenca ntah pe ngembangkenca. Lit piga-piga cara eme : 1). Ibas perkembangen ilmu teknologi si genduari enda, banci siteh kai “kelebihenta” arah sidik jari (sepuluh sidik jari). Bagepe uga ka cara ngembangkenca. Fungsi teknologi enda gelah kita la “merobah” pemere Dibata e. Teknologi enda gelarna emeh Dermatoglyphics Multiple Intelligence (DMI). Dermatoglyphics Multiple Intelligence Assessment ( DMI ) adalah ILMU / METODA yang berbasis teknologi canggih (Statistika & Programa Komputer) guna membaca / mendeteksi PETA POTENSI DIRI melalui sidik jari (FINGERPRINTS) sebagai bentuk rasa syukur & ikhtiar manusia atas karunia TUHAN. 2). Arah kalak sideban. Kalak sideban banci menginformasikan man banta kai pemere Dibata si lit bas kita. Tentuna enda arah pengidahna ras pengalamenna ras kita ibas ngelai i tengah-tengah gereja. 3). Ertoto. Ibas ertoto enda kita mindo man Tuhan, gelah Icidahken Tuhan pemereNa si lit bas kita. 4). Ikut terlibat ibas pelayanen i tengah-tengah gereja. 5). Tandai kai kelebihenta.
Ibas ateta ngembangken pemere Tuhan si lit bas maka : 1). Ula pernah kita nggejapken “minder ntah pe kurang percaya diri” tapi harus percaya diri. 2). Tetap ngataken bujur man Tuhan ras pindo tuntunan Dibata. Alu bage kita ngasup terlibat aktiv ibas pelayanen-pelayanen gereja, jenari gereja Tuhan semakin dewasa erkiteken kita kerina nggeluh ibas sisampat-sampaten ras nggeluh ibas sada kula (gereja).

Pdt. Steven Kumenit, STh, M.Min.