Tema : Penilaian Si Payo Rehna Ibas Tuhan Nari (Johanes 12: 1-8).

BAHAN PJJ GEREJA GBKP
TANGGAL 5 – 11 AGUSTUS 2012.
==============================
Johanes 12: 1-8.

Tema : Penilaian Si Payo Rehna Ibas Tuhan Nari.

LATAR BELAKANG.
1. Perdalanen Jesus ku Jerusalem arah kuta Betania, eme lit 3 km arah timur Jerusalem. I Jerusalem Jesus kesilang i rumah Lazarus sipernah ipekekeNa (band. Joh.11:43-44). Ibas kesaksin Johanes je ikataken sangana Marta kuskas nikapken pangan man Jesus, kenca sie reh Maria icurcurkenna minak wangi simeherga ku nahe Jesus. Minak wangi siicurcurken Maria eme minak wangi narwastu si cukup meherga. Minak wangi siicurcurkenna eme sada botol (band = alkitab bahasa Indonesia ngataken setengah kati).
2. Ibas sejarah kegeluhen bangsa Jahudi, biasana minak wangi enda itukur guna wari perjabunna. Janah itukurna alu mpepulung sen/nabung. Bagepe adi paksa make minak wangi enda, maka harus lebe ipenggelken/ipecahkan bagin siarah datas botol. Kenca ipenggelken/ipecahken berarti harus ipake kerinana, sebab lanai lit tutupna. Emaka banci ikataken kerina minak e icurcurken ku nahe Jesus jenari isapuina alu bukna.
3. Ibas Maria ncurcurken minak wangi ku nahe Jesus ras isapuina alu bukna, lit simandangi ia, janah Maria enggo “siap”. Sebab ibas sada tradisi/budaya kalak Jahudi sekalak diberu la banci ngerbangken/ “menggeraikan” bukna (menguraikan) i lebe-lebe jelma sinterem. Kalak perdenggal ngenca si banci erbahan bage. Tapi la diate Maria, sebab sipenting man Maria eme “penilaian” Jesus man bana, labo penilaian jelma sinterem. Janah kai siibahan Maria e tuhu-tuhu ndarat ibas pusuhna nari ras ibas rangka ngelai Jesus.
4. Ipihak sideban, Judas Iskariot simerupaken ajar-ajar Jesus, bagepe selaku bendahara ibas persadan ajar-ajar Jesus mandangi Maria. Sebab kai siibahan Maria e nina sada pemborosan duit ngenca. Sebab adi idayaken minak wangi e banci Maria ndatken duit telu ratus dinar jenari ibagi-bagikenna man kalak musil. Janah adi sipeseri maka bali kap ras upah harian pekerja sedekah sada tahun. Situhuna kai siikataken Judas enda labo tuhu. Ibas erti kata ndarat ibas pusuhna nari, bagepe bagi tempa teridah mediate ras erdiate ia man kalak musil. Tapi si lit bas ukurna eme uga maka duitna e banci bengket ku bas kantongna, janah ikorupsina. Sebab bage me rusur siibahanna (ayat 6).
5. Megi kai siikataken Judas, nina Jesus : "Ola kam nuhsahi diberu enda! Pelepaslah ibahanna enda guna penguburenKu! Adi kalak musil lit nge pagi lalap ras kam, tapi Aku labo pagi lalap ras kam. Sebab kai siibahan Maria man Jesus merupaken sada persiapen nandangi kematen Jesus. Bagepe sada penghormatan man kalak singgo mate. Sebab perlu siteh salah sada penghormatan nandangi kalak sienggo mate selain iperidiken eme iminaki alu rempah-rempah. Ipihak sideban Jesus ngerana man ajar-ajarNa kerna kematenna nggo ndeher ras “kehadirenNa” (nen = kebersamaan) ras ajar-ajar lit batasna, sebab sada paksa Jesus harus nadingken ajar-ajar erkite-kiteken kematen, kekekenNa ras kenangkihenNa ku surga. Emaka guna ngelai kalak musil lit waktu sicukup ndekah siharus ibahan ajar-ajar man kalak musil.

APLIKASI
Salah sada kelemahenta eme rusur menilai kalak arah darat saja. Emaka erkiteken penilaian e ipake alu negatif thinking maka rusur ka nge salah penilaianta man sekalak jelma. Harus nge siteh maka penilaianta man kalak sideban erbage-bage. Lit erkiteken faktor kepentingen, sentimen pribadi, perbedaan sifat, perbedaan pandangan, bagepe suasana pusuh banci mpengaruhi caranta menilai. Sijadi penungkunen man banta salah kin adi kita menilai sesekalak jelma. Tentuna adi terjeng meteh karakter kalak la kap masalah, tapi adi enggo seh ku hal-hal sideban eme ngukuri ganjang teruhna, bagepe enggo ngataken ia salah, tentuna kita enggo ersalah ras pe erdosa, sebab harus siteh kita enda tinepa Dibata, emaka seri nge kita i lebe-lebe Dibata. Emaka situhuna sibanci menilai kita eme Dibata ngenca, sebab kita enda sikerajangenNa. Adi Dibata simenilai kita la pernah salah, sebab Dibata ngenen seh ku pusuhta, emaka situhuna la lit siterbuni i lebe-lebe Dibata. Penilaianta man sesekalak jelma banci erbahanca kita nggeluh lanai harmonis, padahal ate Dibata kita harus nggeluh ibas persadan. Emaka sipaling penting man banta eme nggeluh ibas kiniteruken ukur ras sikeleng-kelengen.
Minggu enda kita ibabai guna rukur kerna perawatan iventaris gereja. Ibas sienda kita isingetken maka perawaten iventaris merupaken bentuk pelayanenta man Tuhan. Sebab iventaris gereja ipake guna pelayanen i tengah-tengah gereja. Emaka perawaten enda la saja terjeng tanggungjawab serayan Tuhan, tapi kita kerina selaku anggota perpulungen.

Pdt. Steven Kumenit, STh, M.Min.