Begiken Ras Dalankenlah Kata Dibata (Jakup1:17-27)

BAHAN KHOTBAH GEREJA GBKP
2 SEPTEMBER 2012.
=====================================
Introitus : "Ise megi katangKu enda dingen ngikutkenca, ia bali ras kalak pentar si majekken rumahna i babo batu (Matius 7:24).
Ogen : Ulangan 4:1-2; 6-9.
Khotbah : Jakup 1:17-27.
Tema : Begiken Ras Dalankenlah Kata Dibata.

LATAR BELAKANG.
1. Secara umum banci sikataken kitab Jakub enda merupaken surat sikirimken man kalak kristen (asal Jahudi ntah Yerusalem baru) si lit i tanah perlajangan, janah inti kitab Jakup enda eme kiniteken teridah min ibas perbahanan (band. Jakup 2:17).
2. Jakup mereken sada pengelayasi man kalak kristen uga kin nggeluh selaku kalak kristen eme pemere simehuli arah kataNa situhu-tuhu, bagepe ateNa gelah kalak kristen si enggo pekuanakNa ibas sada paksa jadi simeganjangna ibas kerina siijadikenNa. Selaku anak, moral harus nge tetap ijaga gelah arah moral enda, banci ibedaken ras kalak si la tek man Jesus Kristus, janah kalak kristen tetap nggeluh ibas keselamaten. Enda itekanken Jakup sebab singaloken surat enda eme “kalak Jahudi” sienggo jadi kristen. Ibas agama Jahudi kerna lagu langkah (nen = perilaku) cukup ndatken perhatin (ijagana kal). Ibas dunia Romawi, kalak Jahudi terteh kal, misalna ibas pemetehna, bagepe kerna perbahanenna; anak dilaki harus isunat, memelihara hari sabat, ngikuti hukum kerna pangan, bagepe kerna lagu langkah siberbeda ras kalak sideban. Adi kalak sideban erpengakap biasa nari nggeluh ibas gaya geluh kalak kafir, kalak Jahudi la nggit nggeluh alu cara bage, sebab e kerina la bo ngena ate Tuhan. Kalak Jahudi lebih mementingken nggeluh bermoral. Ibas pengangkan sibage me ate Jakup gelah kalak kristen tetap njadiken dirina nggeluh guna ndalanken kata Dibata (ayat 22).
3. Gelah lebih mbages pengangkan kalak kristen e, ibuat Jakup “kata-kata bijak” kalak Jahudi gelah kalak kristen lebih ngangkai uga seharusna jadi pelaku kata Dibata. Bas kalak Jahudi manusia banci ibagi ibas 4 karakter/tipe eme 1). Orang cepat mendengarkan dan cepat melupakan. Enda la bo mehuli., sebab enda la mbaba untung ras la ka bo merugiken. 2). Orang yang lambat mendengarkan dan lambat melupakan. Karakter enda sedikit lebih menguntungken. 3). Orang cepat mendengarkan dan lambat melupakan. Karakter enda mehuli, sebab kalak sibage pentar kap. Kalak si nggit metinggel la minter ngerana ras la pedas merawa. Sienda me siitekanken Jakup man kalak kristen. 4). Orang yang lambat mendengarkan dan cepat melupakan. Karakter enda la bo mehuli, ras la bo ka tersampati.
4. Ate Jakup nuriken enda gelah kalak kristen terhindar ibas dosa. Emaka sipaling pentingna eme pedauhlah kebiasan-kebiasan si melket ras lagu langkah si jahat. Siimaksudken kebiasaan simelket ras lagu langkah sihajat eme kebiasaan manusia male ; erbual/dosa, nangko, cian ate, perampus, pernembeh, siisak-isaken, ntah si cekurak-cekuraken, la lit sialem-alemen salah.
5. Erkiteken sie me kalak kristen harus mperdiateken kata Dibata ras mpergermetkenca, kalak sebage ipasu-pasu Tuhan. Bagepe kalak mperdiateken kata Dibata ras mpergermetkenca bas ia lit hukum kekelengen, janah kekelengen enda la terjeng iangkai saja tapi pe ipraktekken ibas kegeluhen tep-tep wari selaku kalak siberagama.

APLIKASI
Kita selaku kalak kristen. Kata Dibata labo terjeng ibegiken, tapi harus idalanken. Sebab kata Dibata la saja nuduhken dalan man banta, tapi pe mereken kegeluhen man banta (band. Matius 4:4). Sebab man banta kata Dibata la bo guna konsumsi pemeteh, tapi tuhu-tuhu guna konsumsi keselamatenta. Apai ka kita nggeluh ibas paksa enda, melala godaan-godaan sibanci mabai kita ndabuh ku bas dosa. Emaka adi la lit gelementa kerna kata Dibata maka ndabuh me kita ku bas dosa.
Persoalenna genduari nterem kalak kristen meteh kerna pentingna kata Dibata ibas kegeluhenna, tapi la nggit megiken kata Dibata. Enda teridah ibas jarangna ia ku gereja, pjj ras PA kategorial, bagepe kurang ia beribadah i rumah. Menurut pengalaman erkiniteken, biasana kalak sibage mesuna kal ndabuh ku bas dosa. Adi sidalanken kata Dibata maka bas kita lit kekelengen eme sikelengi dirinta bagepe sikelengi kalak sideban. Ibas kita ngkelengi kalak sideban la saja terjeng ibabah tapi ipraktekken ibas perbahanen, tandana kita kalak sieragama (kalak kristen). Janah mprakteken kekelengen alu mehuli ndarat ibas pusuh siersuruh nari. Perbahanen sibage me sipegeluhken kita. Maksudna, nggeluhlah kita ibas doni enda erkiteken ijaga ras ikawali Tuhan kita, bagepe nggeluh kita bas Surga.

Pdt. Steven Kumenit, STh.M.Min.