Ngelai Alu Ngamper Bana (Menyangkal Diri) - (Matius 16 : 21-28).

BAHAN PJJ GEREJA GBKP
TANGGAL 19-25 AGUSTUS 2012.
==============================
Matius 16 : 21-28.

LATAR BELAKANG

Tema : Ngelai Alu Ngamper Bana (Menyangkal Diri).

LATAR BELAKANG
1. Ibas bahan oratenta sendah kerna Jesus mpebetehken kerna akhir kegeluhenNa i bas doni enda. Akhir kegeluhen Jesus i Jerusalem, tapi i je ka Jesus ipekeke ibas simate nari. Ikataken Jesus enda erkite-kiteken i Jerusalem pusat keagamaan kalak Jahudi emaka nterem i je peminpin Jahudi, imam-imam si mbelin ras guru-guru agama Jahudi. Kalak enda la senang man Jesus, emaka ibas kerina kesempatan idaramina kesalahan Jesus, ntah pe isidingina maka Jesus ersalah gelah banci ibaba ku mahkamah agama (sahendrin). I Jerusalem mbelin kemungkinan sura-sura kalak enda tersehi. Isamping sie memang paksaNa enggo seh. Jesus harus ngenanami kiniseran ras mate ibas rangka nehken keselamaten man manusia ras doni enda. Jadi memang labo erkiteken peminpin-peminpin Jahudi, imam-imam si mbelin ras guru-guru agama maka Jesus harus mate, tapi erkiteken enggo seh paksana. Alu la isadari kalak enda jadi bagin ibas karya keselamaten Tuhan i tengah-tengah doni enda.
2. Salah sada alasen Jesus ngataken kerna kematen ras kekekenNa erkite-kiteken enggo lit sada pengakun ajar-ajarNa kerna Ise Ia siiwakili Petrus. Ibas pengakap ajar-ajar, Jesus eme Mesias (band. Matius 16:16). Amin gia enggo lit sada pengakun kerna Jesus eme Mesias tapi kenca ibegina nubuat Jesus enda la bo terangkai ajar-ajar. Akapna enda kerina labo rencana Dibata, emaka tempa ipepalemna pusuh Jesus nina : "Mbera-mbera ipedauh Dibata si e i bas Kam nari o Tuhan! Labo banci jadi e man baNdu! (ayat 22). Tapi iidah Jesus enda kerina pendahin si iblis. Erkiteken sie me nina Jesus : "Laweslah i bas Aku nari, o, Iblis! Isidingindu kap Aku. Perukurenndu perukuren manusia, labo perukuren Dibata (ayat 23). Jadi penungkunen engkai maka bagi i sergangi Jesus perkataaan Petrus ndai ? sebab Petrus enggo jadi batu antuken ras “menghalangi” rencana Dibata.
3. Kenca isergangi Jesus iblis sierdahin arah Petrus, ibuat Jesus kesempaten sekali nari guna ngajari ajar-ajarNa kerna uga kalak siatena ngikutken Jesus. Ngikutken Jesus selaku Mesias harus ipersilahangna bana. La banci dirina saja siiukurina, tapi perukuren Dibata harus iukurina. Sebab ise singukuri dirina saja berarti ia pe tetap denga ngukuri kerna kegeluhen doni saja. Tapi adi erkite-kiteken Jesus ia kebenen kegeluhenna, maka man bana me kegeluhen situhu-tuhu e.
4. Ate Jesus ngajarken man ajar-ajar maka lit me sada kiniseran ras kematen siharus ibentasi ajar-ajar Jesus, tapi enda labo merupaken sada hal siman kebiarenken, sebab ibalik sie lit kegeluhen siisikapken Jesus. Janah man kalak sierbahan kejahaten ngaloken hukuman ibas Jesus nari kenca Jesus reh sipeduakaliken ku doni enda (band. Ayat 27).
5. Harus siteh pe kerehen Jesus i Jerusalem labo ibas rangka ngendesken diriNa man guru-guru agama, imam-imam simbelin ras man pemminpin-peminpin kalak Jahudi, tapi ibas rangka ngelai ije, gelah kuasa si lit ibas Jesus iteh jelma sinterem. Sebab kuasa Jesus eme sada tanda kerehen Mesias ibas doni enda.

APLIKASI
Tugas gereja/kita eme ngelai, subuk ibas gereja bagepe ibas profesi si lit bas kita. Emaka adi kita ngerana kerna ngelai berarti kita erdahin. Tapi sijadi masalah nterem denga kita sikurang tutus ibas ngelai i tengah-tengah gereja bagepe ibas masyarakat. Kinilatutusenta jadi erkite-kiteken kurang ngasup kita ngamper bana (menyangkal diri). Padahal kita enda enggo iselamatken Jesus ibas kayu persilang. Kita enggo nggeluh ibas kemerdekaan.
bagepe ibas kita ngelai alu tutus ras sue bagi sura-sura Tuhan, banci jadi tetap denga kita jumpa perbeben ras kiniseran tapi situhuna ibas sie kita ndatken pemasu-masun ibas Tuhan nari. Emaka ibas kerehenNa pagi kita banci nggeluh ras Jesus. Jadi memang penting kal bas kita ngelai alu ngamper bana. Sebab adi sinen uga manusia ndabuh ku bas dosa eme erkite-kiteken biak ego ras kerangapan siitonjolken. Erkiteken sie dungna pelayanen gereja la erdalan alu mehuli. Sedangken nterem kal kalak si muas ras melihe kerna pelayanen gereja. Emaka ibas kesempaten enda marilahlah kita alu la erleja-leja erdahin ras ngelai i tengah-tengah gereja ras masyarakat sue ras kengasupen ras profesi siibereken Tuhan man banta. Janah harus ka siteh kita ngasup ngamper bana adi kita lalap nggeluh ibas persadan ras Tuhan janah KataNalah silalap siikuti.

Pdt. Steven Kumenit, STh,M.Min.