Kepentaren Erdilo, Dahilah! (Kuan-Kuanen 9:1-6).

KHOTBAH MINGGU 19 AGUSTUS 2012.
GEREJA GBKP.
=====================================
Introitus : Bena-bena kepentaren e me erkemalangen man TUHAN . Man kalak si erkemalangen man baNa iberekenNa kap pemeteh si mehuli. Terpujilah Dibata seh rasa lalap (Mazmur 111:10).
Ogen : Epesus 5:15-20.
Khotbah : Kuan-Kuanen 9:1-6.
Tema : Kepentaren Erdilo, Dahilah!

LATAR BELAKANG
1. Secara umum banci sikataken tujun kitab Kuan-kuanen eme mereken kepentaren ras pengertin uga nggeluh alu mehuli ibas doni enda. Bagepe nggeluh ibas moralitas ras etika simehuli. Emaka kalak siatena nggeluh ibas kepentaren maka sipemenana eme ia harus mbiar ras erkemalangen man Tuhan (Kuan-kuanen 1:7).
2. Erkiteken kepentaren Dibata simadasa, ntah pe reh ibas Dibata nari, maka ise singgeluh ibas kepentaren nggeluh alu meriah ukur. Erkite-kiteken sie ibas bahan khotbahnta sekali enda uga pengamsal “gambarken” kerna kegeluhen ibas kepentaren. Nina : kepentaren enggo pajek, janah pesta nandangi benaken, tading nimai undangan. Emaka isuruh simada pesta pitu pelayanna diberu guna ertenah man ise saja silenga nggeluh ibas kepentaren, gelah reh ras nggeluh ibas kepentaren.
3. Perlu iteh lebe ijenda kerna pengertin ibas ayat 1-3 : Enggo ipanteki kepentaren rumahna janah enggo ipajekkenna pitu palasna. Enggo igelehna asuh-asuhen guna pesta, iraruina anggurna maka itamakenna i meja. Enggo isuruhna pitu pelayanna diberu erlebuh i datas ingan si meganjangna nari ndilo kerina undangen nina. Situhuna ijenda me palas ras inti uga seharusna kita banci ngangkai kerna erti kepentaren. Ija sada perbahanen ras sura-sura simehuli ibas kepentaren nari man manusia guna nggeluh ibas kepentaren gelah manusia nggeluh ibas simehuli. Emaka erlebuh kepentaren man manusiasi silenga beluh rukur gelah reh ku rumah kepentaren e. Tapi mesera siakap ngangkaisa secara “literet” kerna “simbol” rumah enggo ipanteki kepentaren alu, janah enggo ipajekkenna pitu palas bagepe erbahan pesta ras pitu diberu sierdilo man manusia. Para ahli tafsir padan sindekah pe mesera akapna nafsirkenca, emaka banci berbeda-beda tafsiran kerna sie. Erkiteken sie kita la banci terfokus ku bas hal-hal literet ndai, tapi marilah kita ngangkai alu makna kepentaren simbaba kita ku simehuli ras ku bas keriahen.
4. Kalak singgeluh ibas kepentaren kegeluhenna nggeluh me, tapi sebalikna kalak singgeluh ibas kebodohan nggeluh ibas kematen. Erkiteken sie maka manusia harus nadingken kebodohenna ras nggeluh ibas kepentaren. Jadi penungkenen man banta engkai maka kebodohen mpereh kematen ? sebab kalak bodoh idalankenna kejahaten, emaka erdosa ia. Ibas keberdosaan enda me maka penghukumen reh man bana (band. Bil.12:11; Amsal 10:21, rsd)
5. Ibas pendilo kepentaren man manusia ate kepentaren gelah manusia nggeluh ibas keselamaten, emaka kern kebodohan pegeluhken dosa, bagepe kalak sienggo nggeluh ibas keberdosaan harus nadingken kebodohenna, janah nggeluh ibas kepentaren.

APLIKASI
Kepentaren Dibata siiberekenNa man banta selaku kalak sitek merupaken sada keriahen man banta, sebab alu kepentaren e kita ngasup nggeluh alu mehuli ras bagi singena ate Dibata. Amin gia situhuna doni enda erpengakap kepentaren siibereken Dibata eme sada kebodohan (band. 1 Kor. 1:20-21). Perlu siteh kepentaren doni enda berbeda kal ras kepentaren Dibata. Kepentaren doni enda mereken kematen man banta, tapi kepentaren Dibata mereken kegeluhen man banta. Tapi adi siperdiateken ibas kegeluhenta genduari nterem kalak kristen lanai makeken kepentaren Dibata si lit bas ia, tapi siipakena kepentaren doni enda. Sebab labo terbandingken kepentaren doni ras kepentaren Dibata (band. 1 Korintus 3:19).
Kepentaren la banci reh alu sendirina, tapi kepentaren eme pemere Dibata, emaka kalak simbiar ras erkemalangen man Dibata ngenca nggeluh ibas kepentaren. Janah kepentaren si lit bas kita e mabai kita reh dewasana ibas kegeluhen enda. Maksudna kepentaren idatken arah ngoge pustaka si badia ras megi kata Dibata dingen erlajar ibas pengalamen i tengah-tengah doni enda. Sebab alu litna kepentaren iajarina kita uga seharusna nggeluh bujur, adil ras sikeleng-kelengen, rsd.
Alu ngangkai maka kepentaren banci mabai kita ku keriahen ras keselamaten, maka enggo sewajarnalah kita nggeluh ibas kepentaren, janah tetaplah nggeluh ibas pendilo kepentaren. Bagepe singgeluh ibas kebodohen (kejahatan), nggo banci ingadiken, ikutilah pendilo kepentaren kerna kebenaren, kekelengen, keadilen, ras kerina simehuli singena ate Dibata (band. Galati 5:22-23).

Pdt. Steven Kumenit, STh.M.M.Min.