Tetap Erbahan Simehuli Amin Gia Lit Kiniseran (1 Petrus 2:20-21).

BAHAN PJJ GEREJA GBKP
TANGGAL 26 AGUSTUS – 1 SEPTEMBER 2012.
========================================
1 Petrus 2:20-21.

Tema : Tetap Erbahan Simehuli Aminna Gia Lit Kiniseran.

LATAR BELAKANG
1. Banci sikataken kerina kalak kristen ibas zaman gereja mula-mula (band. Abad-abad si pemena), ndatken tantangen si cukup hebat, emaka kalak kristen nggeluh ibas kiniseran. Ngidah sienda, Petrus alu suratna reh man kerina kalak kristen si lit ibas taneh perlajangan, khususna man budak-budak ibas rangka mpegegehi kinitekenna. Enda ibahan Petrus sebab singaloken surat enda mbaru denga jadi kalak kristen. Sebab ate Petrus gelah budak-budak banci meteh uga nggeluh selaku kalak kristen. Nggeluh selaku kalak kristen labo berarti la lit perbeben ras kiniseran, saja uga sikap kalak kristen ibas ngalaken kiniseran e alu make nilai-nilai kekristenan.
2. Selaku kalak kristen, termasuk para budak harus meteh tanggungjawabna. Amin gia nggeluh ibas kiniseran tapi harus tetap loyal ibas pendahinna tep-tep wari. Memang nggeluh selaku budak labo ntabeh, sebab banci kataken sekalak budak la lit hakna. Geluhna tuhu-tuhu lit ibas tan tuanna. Tapi amin bage gia, para budak harus tetap ncidahken moral simehuli ras kiniteken simehuli. Ula erkiteken budak ras nggeluh ibas kiniseran dungna bene kinitekenna. Para budak harus bali ras kalak kristen pada umumna eme harus nggeluh ibas moral simehuli.
3. Ibas surat enda siitujuken khusus man para budak, labo berarti ate Petrus gelah para budak ngaloken geluhna selaku budak saja, lang. Tapi ate Petrus amin gia ia budak tetap min nggeluh alu moralitas simehuli. Para budak harus mpedauh geluh si la ngena ate tuanna.
4. Memang kalak kristen, bagepe para budak ngenanami kiniseran, tetap min ia megenggeng nggeluh ibas kiniseran. Sebab ibas kalak kristen nggeluh ibas megenggeng, berarti kalak kristen ikut muat bagin ibas kiniseran Kristus. Emaka sada “kebanggan” min man kalak kristen singgeluh ibas kiniseran, erkiteken kalak kristen banci nggejapken kiniseran Jesus Kristus. Tapi beda halna megenggeng ibas kiniseran erkite-kiteken salahta sendiri, enda la perlu ibanggaken ras ipujiken, sebab la bo bage simaksudken i jenda. Memang kalak kristen harus bersedia nggeluh ibas kiniseran tapi ula min erkiteken salahta sendiri. (band. 1 Petrus 4:1).
5. Gelah para budak tetap nggeluh bagi singena ate Tuhan amin gia nggeluh ibas kiniseran, Petrus mpebetehken uga Kristus singgeluh ibas kiniseran. Kristus igengkenNa nggeluh ibas kiniseran. La ibalasNa kejahaten alu kejahaten. Tapi ialokenNa kerina e ibas kepatuhan nandangi BapaNa siisurga. Janah isingetken Petrus pe kerna kiniseran Kristus erkite-kiteken dosa manusia ras guna keselamaten manusia. Emaka ate Petrus gelah para budak ngusih kai siibahan Kristus nggeluh ibas kiniseran. Ibas moralitas simehuli siibahan para budak, banci saja ngena ate tuanna, emaka iberekenna pendahin simehuli, emaka lit perubahan nggeluh. Sebab geluh selaku budak tupung sie lit kap tingkat-tingkatna, lit pekerja kasar, lit pengawas ras lit sierdahin i rumah tangga, rsd.

APLIKASI
Adi ngenen kerna kiniseran, turah sada penungkunen man banta apakah kiniseran e sada bagin ibas kegeluhen kalak kristen ? tentuna lang. Tapi adi kita nggeluh ibas kiniseran ula min erkite-kiteken salahta, janah adi erkite-kiteken ndalanken sura-sura Dibata, maka kita harus nggeluh megenggeng ras tetap mindo penampat Tuhan, sebab kalak sibujur ras tutus iperdiateken Tuhan, bagepe adi erlebuh kalak bujur ras tutus ialoi Tuhan (band. Maz.34:16, 18). Bagepe meriah min ukurta ras lit min sada kebanggaan bas kita. Bagepe adi kita nggeluh ibas kiniseran, siangkai min kita enda sangana nggejapken ras ikut muat bagin ibas kiniseran Jesus. Alu bage kita banci ngusih kiniseran ras kegeluhen Jesus.
Kita selaku kalak kristen harus ngusih kerna kegeluhen Jesus eme nggeluh ibas kebujuren ras kepatuhen man BapaNa sinisurga. Janah sinen ibas kepatuhan man BapaNa, Jesus imuliaken. Emaka kita selaku kalak kristen harus ngenen enda. Jadi situhuna la lit sada alasen man banta guna la erbahan simehuli amin gia sangana nggeluh ibas kiniseran. Bagi kita kalak kristen harus ngenen kiniseran e la saja guna mpegegehi kinitekenta, tapi pe harus jadi sada motivasi man banta erbahan simehuli, sebab adi kita ndalanken kai simehuli singena ate Tuhan maka kita ipasu-pasu Tuhan. Emaka ula min kendor kerajinenta ibas ngelai i tengah-tengah perpulungen Tuhan (gereja), sebab ngelai eme tugas ras tanggungjawabta.

Pdt. Steven Kumenit, STh,M.Min.