Tema : Kekelengen Ras Kemerdekaan Sirehna Ibas Tuhan Nari Arus Ipelihara Alu Ertanggungjawab (Kolose 1:24-2:1).

BAHAN PJJ GEREJA GBKP
TANGGAL 12-18 AGUSTUS 2012.
=============================
Kolose 1:24-2:1.

Tema : Kekelengen Ras Kemerdekaan Sirehna Ibas Tuhan Nari Arus Ipelihara Alu Ertanggungjawab.

LATAR BELAKANG.
1. Perkembangan kekristenan i tengah-tengah perpulungen Kolose erdalan alu mehuli, tapi erkiteken lit bahaya pengajaren sipapak siatena ncedai kiniteken perpulungen, alu ngatakenca maka keselamaten labo arah Kristus. Bagepe lit si mpengaruhi perpulungen guna meraguken kerna eksistensi Paulus selaku rasul, janah atena gelah perpulungen nulak Paulus. Ibas situasi ras keadaan sibagenda me maka Paulus ertanggungjawab melurusken kerna pengertin kiniteken ras pengarapen perpulungen.
2. Lit piga-piga hal siikataken Paulus man perpulungen Kolose gelah perpulungen metenget nandangi kerina ajaren-ajaren sipapak, perpulungen Kolose pe banci meteh kerna rahasia simbelin siipetangkas Dibata arah Jesus Kristus man perpulungen Kolose. Perpulungen Kolose nggo dat bagin ibas kemulian Dibata. Padahal nai ope denga kalak kolose lenga tek, kalak Kolose lenga ndatken bagin ibas kemulian Dibata, sebab bagin e hanya bereken man kalak Jahudi. Tapi erkiteken itulak kalak Jahudi Jesus Kristus selaku Mesias, maka keselamaten e seh me ku kalak si labo kalak Jahudi, ras Paulus ertanggungjawab mpeseh Berita simeriah man kalak si labo kalak Jahudi.
3. Ibas perpulungen Kolose ndatken bagin ibas kemulian Dibata, berarti perpulungen Kolose nggo nggeluh ibas keselamaten. Perpulungen Kolose nggo bebas ibas dosa nari, sebab erkiteken dosa me maka Jesus reh ku doni enda, janah nggeluh ibas kiniseran guna nelamatken kerina bangsa, termasuk perpulungen Kolose. Janah enda kerina erkiteken keleng ate Tuhan man perpulungen Kolose.
4. Ipihak sideban ate Paulus gelah perpulungen Kolose meteh maka erkiteken perpulungen enggo tek man Jesus Kristus maka terjadi me kegeluhen persadan perpulungen (kalak sitek) ras Jesus Kristus. Kristus nggeluh ibas perpulungen, bagepe sebalikna. Alu bage perpulungen pe dat bagin ibas kiniseran Jesus Kristus.
5. Ibas kegeluhen persadan kalak sitek ras Jesus Kristus maka perpulungen la saja nggeluh ibas kemulian Dibata, tapi pe perpulungen nggeluh ibas kepentaren sireh ibas Kristus nari. Alu bage perpulungen Kolose ngasup mbedaken pengajaren simehuli ras si la mehuli.

APLIKASI
Kalak kristen nggeluh ibas kemerdekaan. Kalak kristen lanai nggeluh ibas perbudaken dosa. Enda jadi erkiteken Kristus simbebaskenca. Tapi harus siinget kemerdekaanta labo berarti banci nggeluh alu rate-ate. Tapi kemerdekaanta selaku kalak kristen harus min sipakeken ibas rangka ndalanken kai singena ate Tuhan. Kita harus nggeluh ibas kebenaren, keadilen ras keleng ate. Kerina enda banci sindalanken erkiteken kegeluhenta enggo nggeluh ersada ras Kristus, janah kegeluhenta ikuasai ras ipinpin perukuren Kristus. Teklah maka kita ngasup ndalanken perbahanen simehuli singena ate Tuhan gelah kita pe ipengasupna mpehuliken kegeluhen bangsa Indonesia sigenduari nggeluh ibas krisis. Tuhu mberat nge ndalanken kai singena ate Tuhan i tengah-tengah keadaan si genduari, erkiteken siteh genduari doni enda erpengakap kita enda kalak bodoh erkite-kiteken la kita nggit seri ras doni enda. Bagepe ipihak sideban doni enda lalap nidingi kita gelah kita ndabuh ku bas dosa. Ibas kita nulak kerina tipu muslihat doni enda me mekatep kita nggeluh ibas perbeben ras kiniseran. Tapi harus siinget adi kita nggeluh ibas perbeben ras kiniseran erkite-kiteken ndalanken sura-sura Tuhan maka man banta me kinirajaan Surga (band. Matius 5:10). Bagepe pasu-pasu Tuhan simpar man banta erkite-kiteken kita banci nggejapken ras muat bagin ibas kiniseran Kristus. Jadi ibas kemerdekaan sienggo ibereken Jesus man banta, kita selaku anak bangsa, harus ndalanken kemerdekaan Indonesia alu erbahan simehuli singena ate Tuhan.

Pdt. Steven Kumenit, STh,M.Min.