Jadilah Kalak Bujur (Mazmur 34:15-22).

BAHAN KHOTBAH 26 AGUSTUS 2012.
GEREJA GBKP
===============================
Introitus : Tadingkenlah kejahaten, lakokenlah kai si mehuli, bulatkenlah ukurndu erbahan perdamen (Mazmur 34:15).
Ogen : Epesus 6:10-20.
Khotbah : Mazmur 34:15-22.
Tema : Jadilah Kalak Bujur.

LATAR BELAKANG.
1. Sijadi bahan khotbahnta sekali enda eme sada puji-pujin ibas raja Daud nari, kenca ia pulah (selamat) ibas Abimelek nari (band. Ayat 1; 1 Samuel 21:13-15). Igejapken Daud ia pulah (selamat), labo erkiteken kebeluhenna, tapi erkite-kiteken penampat Tuhan. Tuhan mereken kepentaren man bana maka ia selamat.
2. Erkiteken sie me puji-pujin enda sekaligus jadi sada kesaksin kerna penampat Tuhan man bana ras uga Dibata erpihak man kalak benar ras jadi imbang man kalak si la benar. Bagepe kepentaren si lit bas Daud mereken sada pengangkan kerna hak manusia ras hak Dibata. Daud erpengakap hak penghukumen man kalak si la ndalanken kai sura-sura Dibata (band. Kalak fasik) ras pasu-pasu man kalak benar eme Dibata. Erkiteken sie me amin gia Daud lit ibas problem geluh erkite-kiteken isak-isak kalak (band= Saul), bagepe Daud i tan kalak Abimelek, Daud tetap ngendesken geluhna man Tuhan, gelah Tuhan ncidahken kuasaNa man kalak fasik.
3. Ibas pengangkan sibage, maka Daud ngajuk man ise saja, khususna man kalak singgeluh ibas perbeben ras kiniseran gelah tetap me ngandalkan Tuhan. Kalak singandalken Tuhan ntah pe nggeluh alu mbiar man Tuhan (band. Ngelakoken simehuli ras erbahan perdamen), pasti isampati Tuhan. Sebab manusia la terlepas ibas pengenehenen Tuhan. Iteh Tuhan kai siibahan manusia.
4. Memang selaku kalak benar, labo berarti enggo lepas (terhindar) ibas perbeben ras kiniseran, lang. Tapi adi kalak bujur ras tutus ndatken perbeben ras kiniseran, Dibata pasti nampati ia, emaka ibas kalak situtus ernalem man Tuhan erlebuh man Tuhan, ialoi Tuhan me ia.
5. Keberpihaken Tuhan man kalak bujur ras tutus la saja tupung lit ibas perbeben ras kiniseran, tapi pe seh ku Dibata jadi imbang man kalak siernembeh ate man kalak bujur ras tutus. Jadi tuhu-tuhu Dibata jadi pelindung.

APLIKASI
Adi siperdiateken kerna turi-turin penciptaan manusia, ije ikataken maka kita enda eme tempas Dibata (band. Kej. 1:26), erkiteken sie me kita enda merupaken mahluk simehulina/simeganjangna asangken kerina tinepa Dibata sideban. Bagepe kita enda nggeluh harmonis ras Tuhan. Tapi erkiteken dosa, kita sirang ras Tuhan. Kita nggeluh ibas pernembeh ate Tuhan. Tapi sikataken bujur man Tuhan arkiteken keleng ateNa kita banci nggeluh mulihi ibas persadan ras Tuhan. Kita nggeluh ibas keselamatan. Janah guna njagai keselamaten sienggo ibereken Tuhan man banta, Kesah Si Badia ngarak-ngarak ras ngajari kita uga seharusna nggeluh ernalem man Tuhan. Bagepe iajari Kesah Si Badia kita, uga nggeluh megenggeng adi kita jumpa perbeben ras kiniseran. Sebab kerina enda mpereh pasu-pasu Tuhan. Memang adi banci la ateta jumpa perbeben ras kiniseran, sebab ibas pengalaman geluhta, pengkenai perbeben ras kiniseran e banci saja maka kita seh mersoken Jesus selaku Tuhan ras juruselamat. Tapi harus siinget jaminen kerna serpang pulah ras nggeluh ibas kemalemen ate ibereken Tuhan man banta selaku kalak sitek. Bagepe sisadari lit piga-piga sebab maka kita nggeluh ibas perbeben ras kiniseran, termasuk ije pengelako kalak man banta, sierbahanca pe turah nembeh ate ras merawa, janah ateta adi banci kita sendiri singukum ia. Perlu siteh i jenda, kita selaku kalak sitek ula sibuat hak preogatif Tuhan eme kerna menghukum manusia (band. Ul.32:35; Roma 12:19; Heber 10:32).
Bagepe adi sinen ibas kegeluhenta tep-tep wari nterem kita selaku kalak kristen erbahan sila ngena ate Tuhan. Jadi penungkunen man banta engkai maka bage. Memang secara sederhana banci sikataken erkiteken lanai diatena kerna Tuhan, emaka la lit bas kita kekelengen. La kita erkeleng ate man Tuhan ras man temanta manusia, bagepe dirinta sendiri. Perbahanen sibage tentuna mpereh penghukuman bas Tuhan nari. Janah penghukuman Tuhan reh alu erbage-bage bentuk, Tuhan banci makeken erbage-bage sarana guna mpersengeti kita gelah banci jera. Tapi adi siperdiateken kerna eksistensinta selaku kalak kristen, kita erbahan dosa erkite-kiteken la sipake perlengkapen senjata siibereken Tuhan man banta, erkiteken sie me talu kita ibahan doni enda ras siiblis. Emaka la perlu kita heran adi lanai lit bas kita kekelengen situhu-tuhu si reh ibas Tuhan nari, bagepe dungna ngelakoken kinilabujuren i tengah-tengah kegeluhenta.Emaka la perlu mamang ateta ras la perlu kita merawa man Tuhan adi ibas kerehenNa sipeduakaliken pagin kita nggeluh ibas penghukuman Tuhan. Perlu sirteh la ngena ate Tuhan perbahanen si la bujur erkite-kiteken kalak sideban ikut menderita, bagepe kita nggeluh ibas dosa.
Adi sisungkun pusuhta tentuna la ateta nggeluh ibas penghukuman Tuhan. Janah ate Tuhan pe bage. Emaka arah gerejaNa iberekenNa kesempaten man banta gelah kita jera (band. Liturgi bagin pengakun dosa), bagepe secara pribadi ibereken man banta kesempaten guna banci jera ibas kerina perbahanen si la ngena ate Tuhan. Jadi penungkunen man banta banci kin sitaluken kuasa iblis e ? memang adi sipake gegeh ras kuasa manusia, la bo kita ngasup nalukenca. Tapi adi sipake kuasa Tuhan, janah sipakeken kerina senjata siibereken Tuhan man banta maka ngasup kita tedis ngelawan tipu muslihat iblis e (band. Epesus 6:10-20). Alu bage kegeluhenta i tengah-tengah doni enda eme guna ndalanken kebujuren bagi singena ate Tuhan. Emaka marilah kita jadi kalak bujur.

Pdt. Steven Kumenit, STh, M.Min.