Kesah Si Badia Mpengasup Kita Guna Ngalemi (Kejadin 50:15-21)

SERMON KHOTBAH GEREJA GBKP
TANGGAL 17 JULI 2011
==============================
Introitus : Adi lit kalak erbahan jahat man bandu, ola balas alu kejahaten. Bahanlah si mehuli rikutken pengakap jelma si nterem (Roma 12:17).
Ogen : Perbahanen Rasul-Rasul 19:1-7.
Khotbah : Kejadin 50:15-21.
Tema : Kesah Si Badia Mpengasup Kita Guna Ngalemi.

LATAR BELAKANG.
1. Kenca mate Jakup, orang tua Jusup ras senina-senina, maka turah me kebiaren man senina-senina Jusup man Jusup, sebab akapna sekali enda pasti iukum mate me ia kerina. Enda banci jadi erkiteken Jusup lit pangkatna ras lit kuasana i Mesir. Erkiteken sie me maka senina-senina Jusup merekayasa sada cerita janah makeken gelar Jakup, sebab alu make gelar Jakup, pasti Jusup mpertimbangken ukurna guna munuh ia kerina.
2. Turah kebiaren senina-senina Jusup sebab melala kejahaten siibahanna nandangi Jusup selaku seninana. Memang ibenai alu cian ate erkiteken inen senina-senina Jusup, Jakup lebih ngkelengi Jusup asangken ia kerina. Emaka turah perukuren sijahat man senina-senina Jusup, ibunuhNA atena si Jusup, tapi erkiteken ilarang Yehuda, dungna idayakenna si Jusup man “saudagar-sadugar bangsa Median, kalak Ismail” alu erga dua puluh syikal perak (Kej. 37:18-28), kenca sie idayaken kalak Ismael si Jusup man Potifar pegawai Istana Firaun ras kepala pegawai raja (Ke. 39:1).
3. Kearun ate ras kebiaren senina-senina Jusup “simenggerogotisa”, justru ipetetap Jusup ukur senina-seninana. Nina Jusup enda kerina rencana Tuhan, jadi senina-senina Jusup alat Tuhan ngenca gelah sura-sura Tuhan tersehi. Arah perbahanen senina-senina Jusup, dungna ipake Tuhan si Jusup guna “melindungi” Kesusuren Jakup si dungna jadi bangsa Israel.
4. Tole ikataken Jusup man senina-seninana eme penghukuman merupakan hak preogatif Tuhan, labo hak manusia, emaka ula mbiar. Jadi teridah perbahanen si la mehuli siibahan senina-senina Jusup, la erbahanca turah nembeh ate ras dendam guna mbalas kejahatan alu kejahatan, tapi ibalas Jusup kejahatan e alu keleng ate. Ijenda teridah alu jelas kerina enda merupaken perkuah ate Tuhan, ntah pe campur tan Tuhan. Tuhan e pelindung, perkeleng ras pengampun.
5. Turi-turin enda merupaken klimaks ibas turi-turin Jusup ras keluargana, bagepe merupaken sada penggenapen kai siikataken Jusup man senina-seninana kerna nipina (Kej. 37:5-10).



APLIKASI
Ibas hukum agama Yahudi lit hukum pembalasan (Kel.21:12-36; Mtius 5:38). Enda ikataken ibas kontek njaga kebadiaan ras ketaatan nggeluh. Bagepe ibas dunia kalak si lenga nandai Dibata hukum pembalasan pe lit nge, janah enda ikataken sura-sura erpalasken ukur manusia (band. Galati 5:20). Tapi kenca Yesus reh ku doni enda pengajaren kerna kekelengen menjadi palas kegeluhen kalak sierkiniteken man Tuhan. Sebab siidah perbahanen si la lit kekelengen mpeturah kebiaren ras menuntut balas ras saling menghakimi. Ibas kegeluhen menuntut balas ras saling menghakimi enda me, dungna kegeluhenta la nggeluh ibas persadan sapih-sapih kita manusia terlebih ras Dibata. Tentuna gelah la lit bas kita saling menuntut balas ras saling menghakimi, maka nggeluh ibas persadan ras Tuhan menjadi palas man banta, sebab ibas kita nggeluh ibas persadan ras Tuhan kita ikuasai Kesah Si Badia. Kesah Si Badia ngajari kita guna erbahan simehuli kempak temanta, ras pe Kesah Si Badia ngajari kita uga seharusna kita ngalemi salah kalak. Kesah Si Badia ngajari kita uga kita banci ngikuti kerna kai siiajarken Yesus man banta eme kekerasan ibalas alu nir kekerasan, kekerasan ibalas alu kekelengen (band.Ola erbalas nandangi kalak siersalah man bandu, adi iparap kalak kurumndu si kemuhen, bereken parapna kurumndu si kawes - Matius 5:39; Lukas 6:29, rsd.). Bagepe kita isuruh ngalemi alu la lit batas waktuna (band. pitu puluh kali pitu kali-Mat.18:22c). Bagepe Kesah Si Badia mpengasup kita guna erahan bage. Alu bage terjaga me persadanta subuk ibas keluarganta, gereja bagepe masyarakat.
Perbahanen sibage eme perbahanen selaku manusia tinepa simbaru, manusia si la saja nggeluh ibas pertobatan, tapi pe mengaplikasikan kekelengen Tuhan ibas kegeluhenta arah ngalemi salah kalak. Jadi kita amin gia nggo kristen, la kita ngasup ngalemi salah kalak ntah pe “musuh” kita adi make sukat-sukat doni ntah pe erpalasken gegeh manusia, tapi adi sipake gegeh Kesah Si Badia maka uga gia beratna pe perbahanen kalak man banta, ngasup nge kita ngalemisa. Dungna kita jadi pancur pasu-pasu Tuhan man kalak si deban, termasuk man musuhta. Jadi penungkunen man banta, engkai harus bage, sipemena adi kita la ngelemi berarti kita bali kap ras doni enda. Sipeduaken : adi la kita nggit ngalemi salah kalak, berarti ateta nghukum ntah pe erbalas man ia, adi bage berarti kita enggo ersalah ras erdosa man Tuhan, sebab pembalasan ntah penghukuman, e hak preogatif Tuhan (band. Roma 12:19; Heber 10:30; Ulangan 32: 35). Sipeteluken : Erkiteken kita enggo ialemi Dibata, emaka kita rutang sikeleng-kelengen sapih-sapih kita manusia.

Pdt. Steven Kumenit, STh.,M.Min.