Jesus Kristus Jadi Palas Ibas Kegeluhen Simbaru (Epesus 4:11-13)

BAHAN PJJ GEREJA GBKP
TANGGAL 29 JANUARI – 4 FEBRUARI 2012.
=========================================
Epesus 4:11-13.

Tema : Jesus Kristus Jadi Palas Ibas Kegeluhen Simbaru.

LATAR BELAKANG
1. Secara umum : Kota Epesus eme sada kota sicukup meriah, janah cukup terkenal paksa sie. Sebab merupaken salah sada pusat penyembahen. Emaka cukup melala ijumpai ingan-ingan penyembahen man Dewi Diana. Tapi kenca reh Rasul Paulus ras iajarken Rasul paulus kerna keselamaten si tuhu-tuhu, nterem jelma si tek man Jesus Kristus, termasuk piga-piga guru sibaso. Janah erkiteken tek ia man Jesus Kristus, maka itutungna me buku-buku mantrana kerina.
2. Surat Epesus enda ikirim Paulus ibas penjara nari e guna mereken nasehat ras motivasi man perpulungen i Epesus selaku kula Kristus gelah tetap nggeluh sue ras pendilo Tuhan bagi tangtangna nai. Janah ibas rangka njagai pengajaren situhu-tuhu, ibas perpulungen lit erbage-bage pemere Dibata, khususna kerna jabatan-jabaten ibas perpulungen eme rasul, nabi, perberita simehuli, permakan ras guru. Jabatan-jabatan enda fungsina eme memperlengkapi anggota perpulungen, gelah anggota perpulungen seh ku tingkat kedewasaan Kristus si serta. Alu bage kerina anggota perpulungen nggeluh ibas pelayanen Kristus i tengah-tengah perpulungen Tuhan. Alu kata sideban anggota perpulungen harus mbangun kula ni kristus. Erkiteken sie me maka ia kerina harus iperlengkapi.
3. Paulus ngingetken anggota perpulungen, selaku kula ni kristus siertujun gelah kerina anggota perpulungen bergerak ku sada tujun. Tujun si imaksud Paulus eme ersada ibas kiniteken ras ersada ibas penandai kerna Anak Dibata. Emaka ibas pengajaren ras pengepken pemimpin-pemimpin perpulungen enda saja me siharus iikutkenan. Alu bage ibas sada paksa perpulungen Epesus banci dewasa, janah seh ku tingkat kedewasaan Kristus siserta.
4. Sipaling penting ibas perpulungen nggeluh ibas kiniersadan ras sada penandaina kerna Anak Dibata maka, perpulungen lanai i ombang-ambingken galumbang ras ijolah-joleken ku jah ku jenda alu pengajaren- pengajaren si papak, tapi justru ngasup bertahan ras naluken kerina e. Siimaksudken Paulus kerna ajaren sipapak eme ajaren kafir, ajaren bidat (band. Kolose 2:8). Ajaren e tuhu-tuhu membahayaken.
5. Pembangunan e ibenaken ibas Takal kula e (Yesus Kristus). Yesus Kristus me si mereken kepentaren ras si menghubungken ras mereken gegeh man kerina anggota perpulungen termasuk pelayan-pelayan ibas pelayanenna, gelah kerina anggota perpulungen terjaga ras nggeluh ibas kiniersadan. Enda itekanken sebab paksa sie enggo terjadi persadan simehuli antara kalak Yahudi ras kalak non Yahudi.

APLIKASI
Kita selaku persadan gereja eme kalak singgeluh ibas kegeluhen simbaru. Siimaksudken kegeluhen simbaru la saja nadingken kegeluhen si male eme kegeluhen siikuasai dosa, tapi kegeluhen simbaru eme kegeluhen siipinpin Kesah Si Badia janah guna ndalanken kai singena ate Tuhan. Janah perlu pe siteh ibas kita ndalanken kegeluhen simbaru enda me terjadi pemberitaan simehuli nandangi doni enda. Jadi kegeluhen simbaru secara praktis banci sikataken, kegeluhen sincidahken buah-buah simehuli (band. Galati 5:22-23). Emaka kita singgeluh ibas kegeluhen simbaru, seharusna nggeluh bas kegeluhen singena ateNa kerna kiniersadan, sebab biak Kristus enggo lit bas kita, janah Kristus si merupaken Tuhan la pernah ngena atena kerna perpecahan.
Ibas kita nggeluh ibas persadan maka terjadi me kegeluhen sikeleng-kelengen ras saling mperdiateken sada ras sideban. Pemimpin gereja (serayan Tuhan), tuhu-tuhu erdiate ras kepate nandangi perpulungen Tuhan sienggo ibereken Tuhan guna ikepkepna, janah anggota perpulungen pe ikut muat bagin ibas pelayanen-pelayanen gereja. Tuhu kita selaku anggota perpulungen erbage-bagena talenta si lit bas kita, tapi adi sipersada guna pelayanen, maka tentuna kita kerina selaku anggota perpulungen banci nggeluh ibas kedewasaan kiniteken, janah ibas sada paksa kita banci seh ku tingkat kedewasaan Kristus si serta. Enda banci jadi adi kita tetap meteh ras nggeluh ibas kepemimpinan takal gereja eme Yesus Kristus. Jadi kita selaku manusia singgeluh ibas kegeluhen simbaru banci erbahan simehuli ras singena ate Tuhan, erkite-kiteken Yesus Kristus. Alu kata sideban, 1). Yesus eme takal gereja. 2). Enggo icontohken Yesus uga seharusna kalak singgeluh ibas persadan ras Tuhan. 3). Erkiteken kita nggeluh ibas persadan ras Yesus Kristus.

Pdt. Steven Kumenit, STh,M.Min.