PEKAN PENATALAYANEN
GBKP RUNGGUN KAMPUNG SUSUK
WARI III, TANGGAL 24 JANUARI 2012
Introitus : E maka jagailah dirindu dingen jagai pe kerina kalak si enggo itetapken Kesah Si Badia man kepkepenndu. Permakanilah perpulungen Tuhan si enggo itebusiNa alu engkorbanken diriNa seh mate (Perbahanen Rasul-Rasul 20:28).
Ogen : Esekiel 34:1-6.
Khotbah : Perbahanen Rasul-Rasul 20:25-35.
Tema : Solidaritas Ibas Persekutuan Kategorial.
LATAR BELAKANG
1. Secara umum, Paulus ras perpulungen Epesus lit ibas sada ikaten emosional si megegeh, Erkite-kiteken perpulungen Epesus e Paulus sendiri simantekisa. Erkiteken Paulus sendiri simatekisa ras Paulus pe singepkepsa maka kerna kecibal anggota perpulungen e pe iteh Paulus. Tapi erkiteken pendahin sideban siharus idahiken Paulus, khususna lawes ate Paulus ku Jerusalem guna mbaba persembahen sienggo ipepulungna, janah igejapken Paulus nge maka lanai ia banci jumpa ras perpulungen Epesus. Erkiteken sie me i Meletus nari idilo Paulus pertua-pertua perpulungen Epesus guna jumpa ras Paulus.
2. Ibas perjumpaan Paulus ras pertua-pertua perpulungen Epesus, ibereken Paulus wejangen-wejangen simerupaken kata-kata perpisahen.Ibas wejangen enda lit piga-piga hal siitekanken Paulus eme : 1). Adi lit si bene, e labo salah Paulus, erkiteken sie jagai bandu ras jagai perpulungen. 2). Permakanilah perpulungen Tuhan. 3). Erjaga-jagalah sebab lit i tengah-tengahndu nari si atena narik perpulungen si enggo tek man Yesus alu pengajaren si la tuhu. 4). Paulus mereken kata pergegeh man perpulungen alu ngataken pertua-pertua enggo iendesken Paulus ibas pengepkepen Dibata ras ku bas kata lias ateNa, gelah megegeh ras ngaloken pasu-pasu. 5). Usihlah Paulus, alu erdahin sendiri guna keperlun sendiri. Janah mejingkatlah erdahin ras sampatilah kalak musil, sebab malemen kap ate ibas mere asangken ibas ngalo.
3. Tujuan wejangen perpisahen enda eme gelah pertua-pertua banci ngikuti teladan Paulus eme erdahin alu mejingkat ras tetap mberitaken Berita si meriah amin gia lit tantangen ras perbeben, bagepe kiniseran. Alu bage pertua-pertua tetap jadi suruh-suruhen si tutus. Pertua-pertua ngasup erdahin alu la ncari untung man dirina sendiri, ras pang menghadapi tantangen-tantangen.
4. Igejapken Paulus kerna bahaya sibanci turah ibas perpulungen eme kerna ajaren-ajaren sipapak, janah enda banci pedauh hubungen perpulungen si enggo tek man Yesus selaku Tuhan jadi sirang mulihi. Ibas rangka sie pertua-pertua simerupaken serayan Tuhan harus mperdiateken kerna sie. Pertua-pertua harus ngepkep perpulungen gelah anggota perpulungen la terikut ku bas pengajaren sipapak.
5. Guna mengantisipasi pengajaren sipapak, maka pertua-pertua harus tetap ibas pengajaren sienggo iajarken rasul Paulus. Sebab sedekah telu tahun Paulus ngajarken kerna pengajaren si tuhu-tuhu man annggota perpulungen, termasuk pe man pertua. Enda kerina ibas rangka perpulungen nggeluh ibas keselamaten.
APLIKASI
Persekutuan Kategorial eme Mamre, Moria, Permata ras KA-KR merupaken bagin integral ibas gereja, khususna GBKP, janah enda merupaken sada alat pelayanen gereja man anggota perpulungen sue umur ras gender. Siniharapken gelah pelayanen gereja seh man kerina anggota perpulungen.
Erkiteken enda bentukna pelayanen maka sipaling penting, sierdahin ibas kategorial eme kalak singgit erdahin ras spiritualitasna mehuli, sebab si man kepkepenna eme anggota sierbage-bage karakter ras status sosial. Bagepe selaku pengurus kategorial tehna min kerna kecibal perkembangen doni enda, sebab rusur terjadi nterem anggota kategorial erkiteken perkembangen doni enda, bagepe tawaran-tawaran doni ras pe kesibuken-kesibukenna, maka la nai ia reh ku PA ras kebaktin-kebaktin si enggo iaturken gereja. Guna sie kerina anggota perpulungen harus min sada arihna ibas pelayanen i tengah-tengah persukutuan Kategorial. Sebab adi la ersada arih kerina pengurus Kategorial, maka siterjadi eme mekisat ndahiken dahin sienggo iampeken Tuhan man bana, emaka siterjadi man anggota Kategorial la ngenanani ras nggejapken pelayanen ibas gereja, dungna anggota Kategorial bagi “anak manuk la rindung”. Adi enda terjadi, maka anggota Kategorial mesukah ijolah-joleken erbage-bage pengajaren doni enda. Emaka situhuna siertanggungjawab kerna sienda eme pengurus Kategorial, bagepe pengurus Kategorial enggo erdosa man Tuhan. Adi enggo bagenda maka nandangi kena cilaka me kita sijadi pengurus Kategorial, janah enda labo sura-sura Dibata. Sebab perlu siteh, kenca pengurus kategorial ilantik ibas gelar Dibata, maka otomatis pengurus Kategorial enggo jadi permakan, janah dahin permakan eme mpermakani biri-biri si lit, tapi adi permakan e dahinna guna “pebesuri” dirina sendiri eme la mediate nandangi biri-birina, maka tentuna merawa Tuhan man pengurus Kategorial e. Jadi dahin pengurus Kategorial mere minum ras nakan man anggota Kategorial gelah ia kerina tetap ibas rarasan Tuhan. Emaka malem atena ngaloken pasu-pasu ibas Tuhan nari. Erkiteken sie me kerina anggota perpulungen harus nggeluh ibas keharmonisan ras nggeluh mediate. Tandana anggota kategorial nggeluh ibas keharmonisan ras nggeluh mediate, anggota kategorial ula erdalan ku “kawes ras ku kemuhen”, sidungna banci papak erkiteken melalasa megiken pengajaren-pengajaren doni enda. Bagepe selaku anggota Kategorial ula min saling memperngaruhi ku hal-hal si salah. Tapi marilah anggota perpulungen tetap nggeluh ibas persadan ras nggeluh ibas pengepkepen Tuhan arah pengurus Kategorial. Enda me siigelari kita solidaritas.
Pdt. Steven Kumenit, STh,M.Min.
Tidak ada komentar:
Posting Komentar