PEKAN PENATALAYANEN GBKP
WARI VII, SABTU 28 JANUARI 2012.
================================
Introitus : O Bapa, ertoto Aku man baNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me si nuruh Aku (Johanes 17:21).
Ogen : Lukas 10:1-9.
Khotbah : Johanes 17:18-26.
Tema : Jesus Kristus Eme Palas Kiniersadan Solidaritas.
LATAR BELAKANG
1. Secara umum, bahan khotbahnta sada bagin ibas Johanes 17, ras merupaken pertoton Yesus man BapaNa sinisurga. Janah secara khusus bahan khotbahta eme pertoton Yesus man ajar-ajarNa gelah nggeluh ibas kebenaren ras perlindungen Tuhan, sebab enggo iutus Yesus ajar-ajarNa ku doni enda. Bagepe gelahkalak sitek nggeluh ibas persadan subuk sapih-sapih ia manusia, bagepe kalak si tek ras Tuhan.
2. Pertoton Yesus man BapaNa sinisurga erkite-kiteken igejapkenNa, kegeluhenNa ibas doni enda lanai ndekah. Janah kegeluhen ibas doni enda cukup mberat. Ajar-ajar banci selamat erkiteken lit perlindungen ibas Yesus nari, genduari Yesus harus sirang ras ajar-ajarNa erkiteken kematen, maka Yesus ertoto man BapaNa sinisurga, gelah kuasa Dibata simbelin sinjagaisa ibas kuasa sijahat nari, alu bage kegeluhen ajar-ajar tetap nggeluh ibas kebadiaan.
3. Kenca Yesus mate, tentuna dahin keselamaten i tengah-tengah doni enda harus idahiken ajar-ajar Yesus, erkiteken sie me iutus Yesus ajar-ajarNa ku doni enda, janah pelayanen banci berhasil adi kegeluhen ibas persadan nggeluh i tengah-tengah ajar-ajar. Sebab ibas bukti nggeluh ibas persadan kekelengen enda me maka doni enda tek maka ajar-ajar e Yesus sinuruhsa. Alu kata sideban, ibas persadan kekelengenlah siicidahken ajar-ajar Yesus, maka Yesus nggeluh i je. Jadi sentral pertoton Yesus man Bapa guna ajar-ajarNa,gelah tetap nggeluh ibas genduari ras ibas paksa si reh. Bagepe persadan sibali ras persadan Yesus selaku anak ras Dibata selaku Bapa. Subuk Yesus ras Bapa, merupaken sada ikaten si la terpisahken, sebab Bapa ras Anak eme sada. Bage me siniharapken kegeluhen persadan ibas Yesus ras ajar-ajarNa.
4. Kenca Yesus ertoto khusus guna ajar-ajarNa, genduari Yesus ertoto guna kalak si tek man baNa. Pemindon Yesus man BapaNa eme gelah kerina kalak si tek nggeluh ibas persadan (gelah min ersada ia kerina). Ibas nggeluh persadan maka doni enda banci tek maka Bapalah singutus Yesus ku doni enda. Jadi ikaten persadan singgeluh man kalak si tek merupaken gambaren pendahin Yesus i tengah-tengah doni enda, janah persadan e jadi erkiteken Yesus. Jadi ibas pertoton enda, ate Yesus gelah kegeluhen persadan e erpalasken kekelengen, maka doni enda banci nandai ulu persadan e.
5. Ibas ayat-ayat pendungi, Yesus alu tegas ngataken kerna eksistensi Bapa enggo itandai ajar-ajarNa, sebab enggo ipetandaken Yesus man ajar-ajarNa. Bagepe ibas pemeliharaan Bapa man ajar-ajar ras man kalak sitek, maka kegeluhen persadan Yesus ras kalak sitek tetap nggeluh.
APLIKASI
Kerina kalak sitek la saja nggeluh ibas pengutusen nehken Berita Si Meriah i tengah-tengah doni enda, tapi isuruh nggeluh ibas persadan. Siimaksudken persadan eme persadan ibas kekelengen, labo persadan sibali ras STM, ija adi lit keperlun nge maka nggeluh ibas persadan, tapi persadan kekelengen eme persadan singerakut kerina kalak sitek rasa lalap si la terbatas. Janah ibas kalak sitek nggeluh ibas persadan, doni enda banci tek Yesus Kristus singerakut ras sinjadiken persadan e. Persadan sijadi, eme persadan si la mementingken kepentingen sendiri ras la egois, tapi lebih mementingken kekelengen. Sebab ibas kita nggeluh alu persadan sierpalasken kekelengen maka tercipta me dame i tengah-tengah kegeluhenta. Enda me siimaksudken Tuhan man banta selaku kalak si tek man Yesus Kristus.
Harus siinget pertoton Yesus ibas bahan khotbahnta enda, ngataken maka Yesus merinduken persadan sinteguh nandangi kalak si tek man Yesus Kristus. Sebab ibas persadan sinteguh, merupaken sada kesaksin man doni enda. Alu kata sideban ibas pertoton Yesus, kalak sitek harus ncidahken maka ia kerina eme persadan ibas Gereja siharus ndalanken kekelengen. Sebab adi la ndalanken kekelengen maka persadan i tengah-tengah gereja la tersehi. Emaka ibas rangka nggeluh ibas persadan, sipaling penting, kita harus ngusih kerna makna persadan siibaba ras siiajarken Yesus. Yesus ngajarken ras ncidahken uga Ia ras Bapa nggeluh ibas persadan sila terpisahken erkiteken kekelengen ras kepatuhan. Bagepe persadan Yesus ras kita erkiteken Yesus nggit erkurban ras la nggit memeintingken diri sendiri, amin gia lit bas Yesus biak Bapa, tapi nggit Ia mpeteruk baNa guna keselamatenta. Bagepe nggit Yesus bersolider nandangi kita, erkiteken keleng ateNa man banta, janah ateNa gelah kita nggeluh ibas kedamen. Bagepe seharusna ibas kita nggeluh ras Yesus, kita pe harus bersolider nandangi sapih-sapihta manusia. Alu bage pengutusen Yesus man banta i tengah-tengah doni enda banci nggeluh ibas kedamen tuhu-tuhu tersehi.
Pdt. Steven Kumenit, STh,M.Min.
Tidak ada komentar:
Posting Komentar