Pekan Penatalayanen (hari 2) 2012 - Solidaritas Ibas Sektor (Daniel 3:8-16)

PEKAN PENATALAYANEN
GBKP RUNGGUN KAMPUNG SUSUK
WARI II, TANGGAL 23 JANUARI 2012
================================
Introitus : Si peduaken bali ras si ndai e me, 'Kelengilah temanndu manusia bagi kam ngkelengi dirindu Matius 22:39).
Ogen : Matius 22:34-40.
Khotbah : Daniel 3:8-16.
Tema : Solidaritas Ibas Sektor.

LATAR BELAKANG
1. Raja Nebukadnesar majekken sada patung emas i kendit Dura, janah isuruhna mpepulung kerina pejabat-pejabat negara, janah isuruhna kerina pejabat negara e nembah man patung e. Patung e ipajekken erkiteken kiniganjangen ukurna, sebab lalap ia menang, janah kerajaan-kerajaan isekelewetna talu ibahanna, termasuk Yerusalem. Pejabat-pejabat negara Babel harus nembah mungkuk man patung e kenca ibegina sora terompet ras serune, murdap, gitar ras kulcapi, bagepe alat-alat musik sideban. Harus siteh ipepulungna kerina pejabat-pejabat negara ibas rangka peresmian patung e. Bagepe ibas perintah raja, ise si la mungkuk ersembah man patung e maka ia harus ihukum. Penghukumenna eme iambengken ibas api ginuhur si gurlah.
2. Ibas peresmian patung, Saderah, mesah ras abednego, simerupaken kalak Yahudi sienggo jadi pejabat Babel pe hadir i je. Tapi erkiteken kalak enda la nggit nembah mungkuk man patung e, maka iaduken pejabat sideban me kalak enda man raja. Erkiteken sie, telu kalak enda idilo raja, janah isungkun raja me ia, tapi ijabab Saderah, Mesah ras Abednego kerna alasenna. Alasenna engkai maka la nggit nembah mungkuk man patung e erkiteken erlawanen ras kinitekenna. Tapi ibereken kesempaten sekali nari man Saderah, Mesah ras Abednego, guna nembah mungkuk man gana-gana ndai. Sebab nina raja la lit dibata-dibata ibas doni enda singasup nelamatken Saderah, Mesah ras Abednego ibas tanna. Tapi Saderah, Mesah ras Abednego tetap ibas kinitekenna, emaka isuruh raja gelah telu kalak enda iiket ras iambengkeng ibas api si seh kal gurlahna. Tapi ibas api sigurlah iidah raja lit empat kalak ije sangana erdalan-dalan ije, ras lanai teriket bagepe la kena kai pe ia kerina, emaka isuruh raja guna pedaratsa ibas api sigurlah e Saderah, Mesah ras Abednego, janah ipuji raja me Dibata, janah isuruhna kerina kalak mehamat man Dibata, adi lang kena hukum me ia (band. Daniel 3:19-29).
3. Ancamen kematen enggo lit i lebe-lebe Saderah, Mesah ras Abednego, tapi tetap kalak enda ibas pendirianna kerna kinitekenna man Tuhan Dibata. Bagepe ersaksi ia teluna kerna Dibata. Saderah Mesah ras Abednego amin gia enggo isambari gelarna jadi gelar-gelar kalak Babel, tapi kinitekenna man Tuhan la tersambari. Saderah Mesah ras Abednego tetap lit ibas pengarapen ras keselamaten man Tuhan saja.
4. Piga-piga kalak Babilon singaduken Saderah, Mesah ras Abednego man raja Nebekadnesar la katakenna gelar Saderah, Mesah ras Abednego, tapi piga-piga kalak Jahudi (ayat 12). Enda ngataken maka Saderah, Mesah ras Abednego amin gia enggo sambar gelarna ras pe lit jabatenna, tapi tetap kalak pertandang ibas kerajaan Babilon. Bagepe kalak enda la patuh man raja Babilon (Nebukadnesar). Erkiteken sie me merawa kal raja.
5. Ibas turi-turin enda teridah lit sada godaan kiniteken simbelin eme kerna keselamaten, tapi harus patuh man raja ras nembah mungkuk man gana-gana siibahan raja Nebukadnesar. Tapi tetap icidahken Saderah, Mesah ras Abednego kerna kinitekenna si paguh, amin gia ancamanna kematen.

APLIKASI
Persadan siterkitik ibas persadan gereja eme Sektor (PJJ). Janah adi siidah ibas pelayanen gereja, termasuk pe GBKP, maka sektor merupaken salah sada pelayanen gereja gelah pelayanen gereja tuhu-tuhu seh ras tergejap man kerina anggota perpulungen. Erkiteken sie, adi siperdiateken anggota sektor (PJJ) 25 – 30 jabu ngenca. Bagepe siidah sektor eme salah sada ujung tombak gereja, erkiteken sie me keuangen sektor ipegegehi (nen = pembagin), alu sada harapen sektor banci berkreativitas ras nyusun program pelayanen guna idalanken. Guna sie anggota sektor harus lit kerjasamana ras rasa memiliki, bagepe sada penggejapen (nen = Solidaritas) ibas pelayanen gereja. Tapi lit denga kepe anggota sektor si la ikut ibas pelayanen gereja ntah pe menunjang pelayanen gereja. Adi siidah ibas kebaktin PJJ ras PA, sihadir lenga bo maksimal kal, bagepe ibas program pelayanen sideban. Enda lit piga-piga sebab, eme 1). Lit erkiteken sibuk erdahin. 2). Mekisat. 3). La siangkan ibas sektor, rsd. Persoalen enda mpengaruhi persadan. Padahal ibas perkembangen doni sigenduari, adi la megegeh kinitekenta, banci kita talu ibahanna. Emaka sipaling penting man banta sipeturah rasa ngkelengi man Tuhan Dibata, emaka ngasup kita ngkelengi temanta. Ibas kita ngkelengi Dibata, turah bas kita ukur simerincuh siersembah man Tuhan ibas kebaktin PJJ ras PA, bagepe tedeh kal ateta jumpa sapih-sapih kita ibas sektor, janah termotivasi kita guna tetap nggeluh ibas persadan ras nggit kita ndalanken program pelayanen ibas sektor. Lebih asangken sie marilah kita saling menjaga perasaan temanta gelah kalak sideban la tersinggung, pedauh bas kita cian ate, janah marilah kita hggeluh ibas sisampat-sampaten.

Pdt. Steven Kumenit, STh,M.Min.