Pekan Penatalayanan (hari 1) 2012 - Silidaritas Ibas Jabu (Kejadin 6:8-18)

PEKAN PENATALAYANEN
GBKP RUNGGUN KAMPUNG SUSUK
WARI I, TANGGAL 22 JANUARI 2012
================================
Introitus : Meriahlah ateta sabap Ia kap si mada kita, asa kalak si nembah Ia meriahlah ukurna (Mazmur 105:3).
Ogen : Mazmur 105:1-11.
Khotbah : Kejadin 6:8-18.
Tema : Solidaritas Ibas Jabu.

LATAR BELAKANG
1. Ertambahna jelma ibas doni enda, kepeken la iikuti alu erkemalangen man Tuhan, tapi justru teridah manusia erjahatna, emaka ibas perbahanen sijahat siilakoken manusia, erkadiola me Tuhan ngenen manusia tinepana e, erkiteken sie me ersura-sura Tuhan guna ngkernepken tinepana e. Ate Tuhan ngkernepken manusia ras tinepana si sideban arah mpereh mbanjir simbelin (air bah).
2. Penghukumen siilakoken Tuhan e man kalak sijahat/erdosa ngenca, tapi Tuhan erngena ate man Nuah, sebab amin gia ia tading isekitar kalak perdosa tapi, la iikutkenna perbahanen-perbahanen dosa. Emaka ate Tuhan nelamatken Nuah ras keluargana ibas penghukumen nari. Jadi erkiteken kebenaren me, Nuahiselamatken.
3. Ibas rangka nelamatken Nuah, reh me Tuhan man Nuah arah kataNa nina : Enggo ketetapken maka kusasapken me kerina manusia. Kukernepken doni enda erkiteken doni enda enggo dem alu kejahaten manusia, emaka bahanlah kapal man bandu. Soal ukuren ras gedangna kapale, Dibata jine sinetapkenca.
4. Ate Dibata nelamatken Nuah ibas banjir simbelin e, emaka Nuah ras keluargana harus bengket ku bas kapal e, janah la terjeng je saja, tapi ate Dibata nelamatken Nuah guna erbahan perpadanan ras Nuah. Jadi teridah ijenda, keselamaten ibereken Tuhan man kalak si mbiar ras erkemalangen man Tuhan saja. Bagepe perpadanen man kalak singena ateNa.
5. Penghukumen siibahan Dibata secara universal, sebab manusia merupaken tinepa Tuhan. Nuah iselamatken sebab ate Tuhan erbahan perpadanen ras Nuah, gelah ibas kesusuren Nuah terjadi me manusia simerupaken tinepa Dibata situhu-tuhu, emaka kalak si setia ras nggeluh bagi sura-sura Dibata saja siiselamatken Tuhan. Jadi teridah alu jelas, dosa erbahca manusia mate, tapi kalak bujur ndatken kegeluhen ras keselamaten.

APLIKASI
Jabu kalak kristen berbeda kal ras jabu kalak non kristen. Perbedaanna eme, adi jabu kalak kristen Tuhan sendiri sinetapkenca ras njadikenca. Erkiteken sie me keluarga kristen nggeluh ibas pasu-pasu ras perlindungen Tuhan, erkiteken sie me keluarga kristen harus ndahiken dahin-dahin Tuhan ibas doni enda, emaka kerina jabu kalak kristen lit misi siharus idalankenna.
Tapi amin gia keluarga kristen berbeda ras keluarga non kristen, labo berarti keluarga kristen harus memisahken diri ibas lingkungen kegeluhenna, lang. Keluarga kristen eme bagin integral ibas keluarga-keluarga ibas masyakat plural/majemuk. Ibas erti kata keluarga kristen lit tanggungjababna ibas mbangun masyarakat simehuli. Janah enda banci terjadi adi lit min kerjasama ibas anggota keluarga, ibas hal enda lit min solidaritas kerina anggota keluarga. Siimaksudken solidaritas eme sada perasaan ras nggeluh ibas persadan, bagepe solidaritas eme litna partisipasi aktif ibas keluarga.
Ibas keluarga kristen memahami sienda, maka keluarga kristen harus jadi sira ras terang man sekelewetna. Keluarga kristen la banci terkontaminasi ibas erbage-bage perbahanen si la mehuli siibahan masyarakat/doni, tapi erpala-pala njadiken keluargana nggeluh ibas kebadiaan. Sebab kegeluhen keluarga kristen la saja terjeng nggeluh ibas doni enda tapi pe nggeluh kenca kerehen Yesus peduakaliken. Harus siinget perpadanen Tuhan man Nuah, berlaku pe man keluarga kristen eme kerna keselamaten.
Guna njadiken keluarga badia i tengah-tengah masyarakat, ntah pe i tengah doni si dem alu keguluten, maka si paling penting bas keluarga kristen eme nggeluh ibas pengataken bujur, ras tetap rende muji Dibata. Bagepe situriken kerna perbahanen-perbahanen simbelin sienggo sialoken i tengah-tengah keluarganta, bagepe ibas erbage-bage perbeben geluhta Tuhan tetap nampati kita. Enda me harus sidalanken selaku keluarga kristen. Janah enda harus idalanken kerina anggota keluarga. Jadi keluarga kristen harus lit ibas sada penggejapen kerna makna kehadiren keluarga kristen ibas doni enda. Keluarga kristen harus nggeluh harmonis, bagepe keluarga kristen harus nggeluh erkemalangen man Tuhan saja. Tuhan saja sijadi sandaren nggeluhta. Amin gia situhuna, sada paksa jumpa perbeben ras kiniseran, jumpa si la bagi ukurta, ula kita mbiar, tapi tetaplah kita ermeriah ukur sebab Dibata pasti nampati kita.

Pdt. Steven Kumenit, STh,M.Min.