PEKAN PENATALAYANEN
GBKP RUNGGUN KAMPUNG SUSUK
WARI IV, RABU 25 JANUARI 2012
Introitus : TUHAN Dibatandu, ganjangen kap asa kerina dibata-dibata ras gegehen asa kerina kuasa-kuasa si deban. Ia kap Dibata si mbelin dingen mbisa, janah si nasa lit mbiar man baNa. La Ia rayo-ayo ras la Ia nggit ngalo sogok (Ulangan 10:17).
Ogen : Ulangan 10:15-22.
Khotbah : Perbahanen Rasul-Rasul 6:1-7.
Tema : Solidaritas Nandangi Unit-Unit Pelayanen.
LATAR BELAKANG
1. Amin gia paksa sie penindasan siilakoken kalak Jahudi ras pemerintah man kalak kristen cukup mberat tapi perkembangen ras pertambahan jumlah kalak si tek man Yesus cukup pesat. Pertambahan jumlah enda mbaba masalah tersendiri, khususna ibas pelayanen. Kepeken erkiteken reh teremna jumlah anggota pelayanen terjadi me perubaten i tengah-tengah kalak Jahudi si make cakap Yunani ras kalak Yahudi simake cakap heber. Jungut-jungut kalak enda sebab kalak Jahudi simake cakap Junani la ngaloken pemere siseharusna ialokenna tep-tep wari. Tapi situhuna inen arah kacamata sideban kejadin enda erkiteken pengelako iblis, janah ipediat Tuhan e. Tujunna gelah pelayanen i tengah-tengah kalak si tek erdalan alu mehuli.
2. Jungut-jungut terjadi erkiteken pembagin man diberu simbalu kalak Jahudi simake cakap Junani terabaiken. Padahal ibas sada kesepakaten sen siibereken kalak bayak, janah ibereken man rasul-rasul, janah rasul-rasul simbagiken sue ras kebutuhen anggota perpulungen (band. Perbahanen 2:45; 4:34-35). Situhuna terabaiken enda labo erkiteken isengajaken rasul-rasul, tapi masalahna reh teremna kalak sitek man Yesus Kristus si man layanen.
3. Ibas permasalahen enda, sadar rasul-rasul maka pelayanen model enda la banci iterusken, emaka idilona rasul-rasul kerina kalak sitek, janah iturikenna kerna permasalahan ras sura-surana. Ate rasul-rasul gelah iangkat pitu kalak ibas perpulungen nari guna nampati rasul-rasul, khususna ngelai meja (jadi diaken), janah rasul-rasul tetap ibas pelayanenna eme ertoto ras mberitaken Berita Si Meriah. Pitu kalak enda harus kalak simehuli ras dem salu Kesah Si Badia. Usulen siiusulken para rasul iueken perpulungen, emaka ipilihna pitu kalak si mehuli ras dem Kesah Si Badia guna nampati para rasul ibas pelayanen meja eme Istepanus, Pilipus, Prokorus, Nikanor, Timon, Parmenas ras Nikolaos. Pitu kalak enda itotoken ras ipasu-pasu rasul-rasul.
4. Ertoto ras pasu-pasu siibahan rasul-rasul man pitu kalak siipilih perpulungen guna masu-masu ras menugasken pitu kalak diaken enda gelah erdahin alu mejingkat ras tutus. Alu bage siniharapken arah litna pitu kalak diaken enda, dahin-dahin meja, ntahpe pelayanen guna diberu balu-balu lanai terabaiken, sebab enggo lit sikhusus ndahikenca.
5. Situasi siterjadi ibas bahan khobanta situhuna gambaren siterjadi ibas gereja mula-mula, ija lit penindasan ras perkembangen jumlah anggota kalak sitek, ras pelayanen rasul-rasul “la nggit” isibukken alu pelayanen sehari-hari di luar pelayanen ertoto ras mberitaken Berita si Meriah. Bagepe masalah teratasi alu litna arih-arih (demokrasi).
APLIKASI
Unit-unit pelayanen eme sada unit sierdahin guna menunjang pelayanen-pelayanen i tengah-tengah gereja GBKP, subuk moderamen, klasis bagepe runggun. Enda iangkat erkiteken inen program-program pelayanen harus idalanken, khususna ibas tri tugas gereja, gelah anggota perpulungen banci nggejapken pelayanen gereja. Guna sie sierdahin i tengah-tengah gereja (unit-unit) si lit harus kalak situtus ras nggit erdahin, bagepe harus nggeluh ibas keharmonisan. Bagepe pelayanen siidahinken unit-unit la banci rayo-ayo, gelah la turah perubaten i tengah-tengah perpulungen. Jadi intina unit-unit enda erdahin guna mpeteguhi persadan i tengah-tengah gereja.
Amin gia erbage-bage unit si lit i tengah-tengah gereja, tapi siniharapken eme kerina unit-unit harus lit kerja sama gelah seh me kai si jadi tujun gereja, khususna ibas tahun 2012 enda kerna tahun solidaritas internal.
Unit-unit pelayanensi lit i tengah-tengah gerejanta eme PWG, Retreat center, Pastoral Counseling, Gelora Kasih, PRT, Paduan suara ras musik gereja, pendidikan, kesehaten (seksi-seksi si lit termasuk ibas unit pelayanen), rsd. Unit-unit enda harus erbahan program,janah harus ndalanken ras dahiken program e. Ibas kerina unit-unit pelayanen i tengah-tengah gereja harus erdiate ras mediate nandangi program si lit. Bagepe unit-unit pelayanen harus nggit ngelai ibas rangka peningkaten kiniteken anggota perpulungen, ras anggota perpulungen nggejapken kerna pelayanen gereja. Alu bage anggota perpulungen nggeluh ibas solidaritas.
Ibas kerina unit-unit pelayanen erdahin maka program pelayanen pasti erdalan janah anggota perpulungen banci nggejapken kerina. Alu bage, la pe isuruh ia ku gereja, reh sendiri me ia, ras ngena ate kalak nandangi persadan gereja. (band. Ayat 7).
Pdt. Steven Kumenit, STh.M.Min.
Tidak ada komentar:
Posting Komentar