Jabu Kalak Kristen Jadi Sirang Ras Terang (Matius 5:13-16)

BAHAN PEKAN KEBAKTIN KELUARGA
GEREJA GBKP
WARI II, 4 JUNI 2012.
=============================
Intoritus : Sibahanlah sada bilik kitik i babo tarum, jenari sitamaken i je sada ingan medem, sada meja, sada kursi, ras sada lampu, gelah adi reh kenca ia ndahi kita banci ia tading i je." ( 2 Raja-Raja 4:10).
Ogen : 2 Raja-Raja 4:8-13.
Khotbah : Matius 5:13-16.
Tema : Jabu Kalak Kristen Jadi Sirang Ras Terang.

LATAR BELAKANG
1. Sijadi oratenta sekali enda, perikop si cukup terkenal, sebab enda merupaken sada rangkaian denga ras khotbah Yesus i das uruk (pasal 5 – 7). Ibas khotbah Yesus si peduaken enda Yesus ngerana ras menekanken kerna kualitas eksistensi geluh manusia, alu make anding-andingen sira ras terang doni.
2. Sira man kalak Jahudi berfungsi labo saja guna pangan/ gulen gelah banci ntabeh, tapi pe guna mengawetkan nurung ras mencegah pembusukan. Bagepe ibas lingkungen para rabi, sira eme lambang kepentaren (Kol.4:6). Jadi alu nggeluh ras ngerana alu mehuli (pentar) maka ajar-ajar terhindar ibas kehancuran (pembusukan), janah banci mpengaruhi kegeluhen masyarakat. Bagepe ibas kegeluhen agama, sira eme tanda perjanjin persahabatan Tuhan ras manusia, emaka ibas bangsa Israel nehken kurban sajian, ibas sajian e harus itama sira (Imamat 2:13; 18:19; 2 Tawarik 13:5).
3. Terang doni ipake Yesus sebage anding-andingen, gelah ajar-ajar Yesus (singikut Ia) banci ersinalsal ibas kegeluhenna, tapi sinalsal siharus ipancarkan ajar-ajar eme biak Jesus Kristus, sebab Yesus Kristus nge ulu terang e (Yohanes 8:12). Ibas ajar-ajar (singikuti Yesus) jadi terang doni, maka perbahenen ajar-ajar tuhu-tuhu enggo ncidahken maka ajar-ajar nggeluh ibas terang, kuasa-kuasa kegelapen lanai erkuasa ibas kegeluhen ajar-ajar (singikuti Yesus).
4. Ibas ajar-ajar (singikuti Yesus) jadi terang maka kalak sideban banci ngidah cahaya terang arah perbahanen sitep-tep wari. Ija nari pe banci ngidah terang e. Jadi ajar-ajar ibarat lampu sibercahaya idas uruk sibanci idah kalak iteruh nari. Tapi sebalikna adi ajar-ajar la ngasup memancarkan cahaya terang, maka bali nge bagi lampu sitamaken iteruh gantang, sidungna nimpet, sebab la lit oksigen ije.
5. Ibas ajar-ajar Yesus jadi sira ras terang doni maka kalak sideban banci memuliaken Tuhan.


APLIKASI
Harus siinget pembentuken keluarga kristen eme ibas Dibata nari, labo saja mpersadaken sekalak dilaki ras sekalak diberu. Tapi ibas rangka jadi perpanjangen tan Tuhan ibas doni enda. Keluarga kristen harus nggejapken maka lit sada dahin siibereken man bana eme njadiken doni enda ratur ras nggeluh ibas kemalemen ate (nen = lit kedamen, keadilen, kesejahteraan, rsd) amin gia situhuna sigejapken dahin enda labo gampang, tapi dahin e harus sidahiken.
Bagepe harus ka sisadari kegeluhen keluarga kristen la terjeng nggeluh ibas doni enda, tapi kegeluhen kalak kristen harus nggeluh ibas perbahanen simehuli ( nen = introitusta). Alu bage kegeluhen keluarga kristen harus ndalanken kai singena ate Tuhan. Keluarga kristen harus njadiken keluargana sira ras terang doni. Maksudna perbahanen simehuli sierpalasken Tuhan harus ersinalsal ibas doni enda gelah doni enda banci ngenen kebenaren situhu-tuhu, janah reh ia ku kebenaren situhu-tuhu. Sebab siidah genduari perbahenen si la benar, si la mehuli, si la ngena ate Tuhan enggo jadi bagin si la terpisahken ras doni enda. Lanai akapna ntabeh adi la ndalanken kerna simehuli ras singena ate Tuhan. Tapi adi nggeluh biak-biak Kristus ras Kristus jadi Takal keluarga maka praktek-praktek kegelapen lanai ilakokenna. Janah harus ka siinget Tuhan kap jadi ampang-ampang keluarga kristen sierbahan mehuli. Ibas erti kata keluarga kristen ngasup ngalo-ngalo temue alu mehuli, termasuk nggit rumahna jadi ingan pulung kebaktin (PJJ ras PA-PA). Emaka ibas perbahanen simehuli siicidahken ras siiprakteken keluarga kristen maka ngena atena man keluarga-keluarga kristen ras nggit ia ngikuti kai siibahan (simehuli) keluarga kristen. Alu bage ibas sada paksa ipujina Dibata. Jadi tuhu-tuhu keluarga-keluarga kristen enggo jadi sira ras terang, tuhu-tuhu kegeluhen keluarga kristen banci ernanam ras banci nampati keluarga-keluarga sideban ngenen kern kai simehuli ras kai singena ate Tuhan. Alu bage kegelapan lanai erkuasa ibas doni enda tapi terang si rehna ibas Dibata nari sierkuasa.

Pdt. Steven Kumenit, STh,M.Min.