Tanda Ras Bukti Ibas Jabu Kalak Kristen (Matius 6:1-18)

BAHAN PEKAN KEBAKTIN KELUARGA
GEREJA GBKP
WARI IV, 6 JUNI 2012.
=================================
Introitus : Sangap kal Kalak si malang man Tuhan, Si nggeluh ngikutken kerina perentah-perentahNa (Mazmur 128:1).
Ogen : Mazmur 128:1-6.
Khotbah : Matius 6:1-18.
Tema : Tanda Ras Bukti Ibas Jabu Kalak Kristen

LATAR BELAKANG
1. Mere man kalak Jahudi merupakan sada perbahanan sibiasa ilakokenna. Bage pe mere nandangi kalak musil merupaken sada kewajiban. Jadi enda merupaken perbahanen simehuli. Tapi siterjadi, khususna man kalak Farisi mere gelah ipujiken kalak, enda me biak pekulah-kulah. Enda me siikritik Jesus. Adi mere man kalak musil ula min igejek-gejekken ras adi mere harusn alu pusuh nari, gelah kalak siisampati e ermeriah ukur. Alu bage ibere Dibata upah man kalak sierbahan bage.
2. Bagepe ibas zaman Tuhan Yesus kalak Yahudi erpengakap hal ertoto merupaken sada kewajiban agama. Erkiteken pemahaman sibage, khusus kalak Parisi ibas ia ertoto icidahkenna kiniganjangen ukurna. Ija ertoto ia alu nggedang gelah iidah kalak ia beluh ertoto. Bagepe ibas budaya agama Jahudi lit kap jam-jam ertoto eme jam 9, jam 12 ciger ras jam 15 karaben, itambah ka doa ope man. Ibas pertoton e lit rumusen-rumusenna, tapi kalak Yahudi meteh maka banci ia menambahken kalimat-kalimat doa e. Jam ertoto e tentuna sangana kalak Yahudi (Parisi) beraktivitas, janah adi nggo she paksana jam ertoto, tupung ijapape ia, apakah sangana ia lit isimpang-simpang dalan, sangana i ipajak rsd, ije me ia ertoto. Kepeken enda kerina idalanken terjeng nehi kewajiban jam ertoto ngenca, janah guna ncidahken maka ia kalak si “badia”. Perbahanen sibage me si la ngena ate Yesus Kristus emaka iajarken Yesus me uga seharus ertoto man ajar-ajarNa. Pengajaren Yesus enda sekaligus mengkritik kegeluhen ertoto kalak Jahudi e.
3. Ibas ertoto siharus ihindari eme kiniganjangen ukur (sombong), ntah pe motivasi guna memamerkan diri ibas ertoto. Sebab adi pertoton siisehken guna ndarami pujian manusiawi, e labo ertoto gelarna.
4. Tapi ibas ertoto sipenting eme lit kiniteruken ukur ras lit ibas keheningen. Maksudna gelah ibas ertoto man Tuhan, la lit singanggu kita. Alu bage pertoton e banci terkonsentrasi. Nina Tuhan Yesus bengketlah kubas kamar janah eruklah pintun kamarndu. Guna ngajarken uga seharusna ertoto maka Yesus ngajarken pertoton Tuhan. Pertoton Tuhan enda me pertoton sipraktis.
5. Bagepe kerna erpuasa. Jesus ngajarken uga seharusna kern hal erpuasa. Puasa sibenar ras simehuli eme ula pekulah-kulah, alu bage pe ula padah iteh kalak kita sangana erpuasa. Tapi erpuasa alu sinik-sinik, Dibata saja simeteh kita enda sangana puasa. Sebab puasa e bentuk ras sipatna lit hubungenta ras Tuhan. Ibas puasa lit pernyesalan dosa ras komunikasinta ras Tuhan. Jadi labo saja terjeng mantangken pangan ras inemen saja. Jadi tujunna gelah kegeluhen spiritualitasta reh ulina, sebab kenca erpuasa kita banci nggeluhken kegeluhen selaku kalak sincidahken pertobaten

APLIKASI.
Adi ninta jabunta eme jabu kalak kristen kai dage tandana ? tandana eme mbiar ras erkemalangan man Tuhan. Tapi situhuna la terjeng e saja, sebab kalak sierkamalangan man Tuhan harus teridah ibas perbahanenna tep-tep wari. Sebab ibas kita ndalanken perbahanen berarti kita enggo mengaplikasikan kinitekenta arah perbahanenta. Perlu siinget perbahanenta e la saja erbahanca meriah ukurta tapi pe meriah ukur kalak sideban. Erkiteken sie me perbahanenta e harus ilakoken alu pusuh sibersih ras dem alu ketutusen. Ibas kita ndalanken perbahanen alu pusuh sibersih, e berarti perbahanenta idorong ras termotivasi guna ngelai Tuhan ras gelah gelar Dibata terpuji, labo erkite-kiteken gelah kita ipujiken. Alu kata sideban kai siibahan kita la banci alu pekulah-kulah, ntah pe erpalasken pusuh si la bersih. Sebab harus siinget perbahanen simehuli e pasti ipasu-pasu Tuhan.
Adi siperdiateken lit nge keluarga-keluarga kristen, siteridah tutus ia ku ergereja, bagepe tutus ka ia ertoto ras erpuasa, tapi ibas soal mere bagi sikurang denga, bagepe kegeluhenna tetap denga ndalanken kai si la ngena ate Tuhan. Adi bage perbahanenna berarti ertoto ras erpuasa e pekulah-kulah denga. Adi kita memang kalak simbiar ras erkemalangan man Tuhan harus min teridah ibas kita biak nggitmere sebab enda menyangkut kubas hubungenta ras kalak sideban. Teridah pengaplikasianna ibas kegeluhenta tep-tep wari. Adi jungut-jungut kita lebe, maka mere la mbaba pasu-pasu man banta bage man kalak sideban. Bagepe adi ertoto ras erpuasa kita bahanlan tetap simehuli singena ate Tuhan. Ula cidah-cidahken man kalak, maka kita enda sekalak sibeluh eroto ras tutus erpuasa. Bahanlah maka Dibata saja simetehsa, sebab enda merupakan hubungan pribadi antara kita ras Tuhan. Alu bage meriah ukurta ras geluhta nggeluh pe ibas kesangapan.

Pdt. Steven Kumenit, STh,M.Min.