BAHAN PEKAN KEBAKTIN KELUARGA
GEREJA GBKP
WARI VI, JUMAT 10 JUNI 2011
=============================
Introitus : I bas persadanndu ras Kristus, kam pe ras kerina kalak si deban iranggut jadi sada rumah, i ja Dibata ringan alu KesahNa (Epesus 2:22).
Ogen : 1 Tesalonika 5:8-11.
Khotbah : Epesus 5:17-24.
Tema : Peran Jabu I Tengah-Tengah Pelayanen Gereja.
Senina ras Turang ibas Yesus Kristus
Adi siperdiateken alu manjar-anjar bahan khotbahnta enda, rasul Paulus mpersingeti perpulungen i Epesus gelah jadi anak-anak terang, anak-anak si berbeda ras anak-anak doni enda, anak-anak si lenga nandai Yesus selaku Tuhan. Anak-anak terang harus ncidahken citra diri, selaku kalak si enggo ngaloken keselamaten ibas Dibata nari, erkiteken sie anak-anak ibas terang, katawari paksa pe harus ngataken bujur alu ngendeken nden-enden pujin guna Tuhan. Jadi memang rasul Paulus menekanken gelah biak selaku kalak si lenga nandai Dibata nai, harus itadingken, sebab biak si bage la mperehken keselamaten. Memang perpulungen Epesus, khusus si berlatar belakang Yahudi, nai perbahanenna ras ende-enden pujinna labo guna Dibata, tapi guna deewa-dewa, janah perbahanenna pe, perbahanen si la mehuli nge siilakokenna. Jadi kegeluhen “kekafiran” la nari nggeluh, sebab perpulungen Epesus enggo jadi anak-anak ibas terang (keselamaten). Sada hal simbedaken anak-anak terang ras kegeluhen kalak “kafir” eme anak-anak terang kegeluhenna, nggeluh ibas kebaikan ras keadilen (bah.Indo = kearifan), emaka gelah tetap steril selaku anak-anak terang, perpulungen Epesus ula terpengaruh nandangi ajaren-ajaren si papak, bagepe ula erteman ras kalak simbaba pengajaren ras kalak sierbahan perbahanen si la mehuli. Guna sie me Paulus persingeti perpulungen Epesus gelah ula bodoh, tapi tetaplah nggeluh ibas kepentaren, sebab kalak singgeluh ibas kepentaren tentuna ngasup mbedaken apai peraten Tuhan, ras apai si lang. Bagepe, siidah ijenda la saja kegeluhen pribadi selaku kalak kristen siitekanken Paulus, tapi pe kegeluhen keluarga kristen. Ibas erti kata manifestasi (perwujudan) Roh harus teridah i tengah-tengah keluarga, ija perbulangen ras ndeharana harus nggeluh sikeleng-kelengen. Ibas erti kata sekalak ndehara harus patuh man perbulangen ras sekalak perbulangen harus ngkelengi ndeharana. Jadi kegeluhen sierpalasken kekelengen harus tuhu-tuhu nggeluh, sebab erkiteken kekelengen nge maka perbulangen ras ndehara ipersadaken, bagepe erkiteken kekelngen nge maka Yesus Kristus ngendesken diriNa guna jadi kurban simerim bagi Dibata. Jadi ibas keluarga teridah hubungen sierat.
Senina ras turang ibas gelar Yesus Kristus
Adi kita ngerana pelayanan gereja, kita pe ngerana kerna peran keluarga, sebab la kap mungkin pelayanan gereja erdalan alu mehuli adi la isampati keluarga. Adi bage maka gereja banci “nggeluh” adi litlah peranan keluarga ibas. Emaka gelah pelayanan gereja tuhu-tuhu banci erdalan alu mehuli, sipaling penting ibas keluarga eme, kegeluhen keluarga harus idemi alu Kesah Si Badia, keluarga harus nggeluh ibas sada perarih (nggeluh harmonis). Janah adi kita ngerana kerna peran keluarga ibas pelayanan gereja, maka harus sibagi ibas dua bentuk, eme 1). Peran keluarga secara langsung. Ijenda ibutuhken gelah keluarga-keluarga muat bagin ibas pelayanan gereja. Antara lain eme ikut muat bagin ibas er-Pekabaran Injil, subuk PI ku ndarat gereja bage PI ku bas. Sebab nterem denga jelma silenga nandai Dibata, ras lit denga senina turangta si monce-once kinitekenna, emaka adi lit perbeben ras kiniseran bas ia la ia ku gereja, ntah pe ku perpulungen jabu-jabu, emaka kita sienggo mbages ras megegeh kinitekenta, sewajarna nge si dahi senina turangta guna nehken pelayanan, apakah arah perkunjungen rumah tangga, ntah pe ibas bentuk sideban. Emaka situhuna, pelayanan gereja la saja milik/dahin serayan Tuhan, tapi pe kita kerina. Bagepe keluarga harus ikut ibas kebaktin keluarga, eme perpulungen jabu-jabu. Tapi cukup isayangken melala denga jabu kalak kristen si la bersedia rumahna ipake jadi inganta pulung, ntah pe lit denga senina turangta singaloken rumahna jadi inganta pulung terjeng sue roster saja, jadi sada tahun sada ntah dua kali saja rumahna jadi ingan pulung. Padahal adi siukuri alu mbages maka rugi kal kita, adi rumahta la pernah ntah pe jarang ipake guna jadi ingan perpulungen jabu-jabu ntah pe PA. Sebab dungna kari arah rumahna e la pernah terbegi suara rende guna muji ras mbelinken gelar Tuhan, ipihak sideban jarang dat pasu-pasu Tuhan. Cuba siperdiateken adi rumahta jadi ingan pulung, si jadi eme tep-tep pertoton syafaat pasti sitotoken tuan rumah subuk kesehatenna, pendahinna, kinitekenna begepe penemani Tuhan man banta. Adi enda lalap sialoken maka siterjadi eme kemalemen ate. Enda me si la lit man kita, adi rumahta jarang jadi inganta pulung. Hal sideban gelah jabunta banci berperan ibas pelayanen gereja eme keaktifenta ibas kegiaten-kegiaten gereja, apakah nehken persembahen ntah pe nehken kai si jadi tanggungjawabta ibas gereja.
Senina ras turang ibas gelar Yesus Kristus
Hal sipeduaken, eme peran keluarga secara la langsung. Ijenda siniharapken man keluarga gelah nggeluh ibas keharmonisan, sebab ibas keluarga kristen nggeluh ibas keharmonisan, maka siterjadi pelayanan-pelayanan gereja banci erdalan alu mehuli, setidaknya, waktu gereja la tersita guna pelayanan pastoral erkiteken keluarga e la harmonis, perbulangen ras ndehara la siangkan. Hal sideban eme keluarganta harus tutus ibas ibadah keluarga, gelah spiritualitas keluarga erdewasana, emaka lanai terpengaruh ku bas erbage-bage pengajaren sipapak si lit ibas doni enda, khususna anak banci terhindar ibas pinakit masyarakat, sebab penakit masyarakat enda, enggo jadi kebiaren man banta. Jadi pinakit masyarakat banci sitambari alu kata Dibata. Bagepe keluarga harus tutus ku gereja gelah keluarga pe banci meteh kerna kai siharus ibahan i tengah-tengah gereja. Bagepe hal sideban eme keluarga-keluarga kristen harus nggeluh sikeleng-kelengen, la saja ibas sada jabu tapi pe ras jabu-jabu si deban, sebab ibas kita nggeluh sikeleng-kelengen maka siterjadi eme persadan (keharmonisan) ibas gereja. Janah enda me gereja situhu-tuhu. Ibas pengertin, nggeluh ibas gereja kita lanai mbaba status sosialta, tapi memang tuhu-tuhu kita nggeluh ibas sada ikaten keluarga simbelin sitergelar gereja, kita tuhu-tuhu saling membutuhkan sada ras sidebanna.
Senina ras turang ibas gelar Yesus Kristus
Hal sideban, siniharapken man keluarga gelah ikut muat bagin ibas pelayanen gereja eme memaksimalken talenta-talenta (kaunia-karunia) si lit ibas keluarga. Apakah muat bagin ibas koor, muat bagin ibas song leader ntah pe lit anggota keluarga sibeluh musik gereja. Janah tentuna melala denga bentuk-bentuk siharus ibahan keluarga ibas rangka pelayanen i tengah-tengah gereja Tuhan. Saja perlu siteh, ibas kita (keluarga) muat bagin ibas pelayanan gereja, ibas erbage-bage bentuk, enda nuduhken manifestasi (ncidahken) Kesah Si Badia erdahin ibas kita kerina. Tapi harus ka siinget ibas kita muat bagin ibas pelayanen gereja, ula kita meganjang ukur, tapi marilah gelah terpuji gelar Tuhan. Sebab percuma nge ibas kita muat bagin ibas pelayanen gereja, janah turah kiniganjangen ukur, janah lit bas ukurta adi la keluarganta simuat bagin maka gereja enda la erdalan. Pemahaman enda salah, sebab Dibata e Dibata sierkuasa, emaka ngasup nge Dibata make keluarga sideban guna ngelai ia. Harus siinget adi ipake Tuhan keluarga sideban berarti lanai Dibata memerluken kita, emaka sepanjang kita ipake Tuhan denga, ula sempat meganjang ukurta. Ipihak sideban adi kita la muat bagin ibas pelayanen gereja maka sura-sura Tuhan guna doni enda eme kerna keselamaten agak tersendat, janah kita me sisalahna. Bagepe adi keluarganta la nggeluh harmonis, bagepe secara gereja la kita harmonis maka persadan gereja jadi keropos, emaka adi reh erbage-bage pengajaren sipapak, ndabuh me kita. Emaka marilah sipake kerina talenta guna kemulian Tuhan.
Pdt. Steven Kumenit, STh.,M.Min.
Tidak ada komentar:
Posting Komentar