MENINGKATKAN SEMANGAT GOTONG ROYONG DALAM MENGERJAKAN PEKERJAAN GEREJA (1 Korintus 3:1-9a)

BAHAN PJJ GEREJA GBKP
TANGGAL 3 – 9 JULI 2011
========================
1 Korinti 3:1-9a.

Tema : Ningkatken Semangat Gotong Royong Ibas ndahiken Dahin Tuhan

LATAR BELAKANG
1. Perpulungen Korinti eme perpulungen siipanteki Paulus ibas kurang lebih tahun 50 SM, paksa perdalanen missionaris peduaken guna nehken Berita si meriah. Tapi ibas perdalanen waktu, perpulungen Korinti nggeluh ibas kelompok-kelompok. Lit kelompok Apolos, lit kelompok Petrus/Kefas ras lit kelompok Paulus. Telu kelompok enda la sicocoken (labo Paulus, Apolos ras Petrus/kefas si la cocoken e tapi pengikut-pengikutna). Tentuna ibas situasi sibagenda banci mpengaruhi kegeluhen persadan gereja ras dungna gereja banci pecah. Padahal selaku gereja harus min nggeluh sikeleng-kelengen ras nggeluh ibas persadan.
2. Ibas situasi sibagenda reh surat Paulus guna mpersingeti perpulungen Korinti, gelah perpulungen Korinti banci ngangkai eksistensina selaku kalak sierkiniteken man Tuhan Dibata. Ibas nggambarken kerna kiniteken perpulungen Korinti, Paulus ngataken maka perpulungen Korinti lenga dewasa kegeluhen pertendinna, emaka Paulus ngerana man perpulungen bagi ngerana man kalak si medanak denga kinitekenna man Kristus. Emaka susu dungna inemenna siibereken Paulus, labo nakan keras. Alu kata sideban Paulus la banci ngerana man perpulungen Korinti selaku “manusia rohani”, sebab si lit man perpulungen eme cian ate ras perselisihan. Enda ikataken Paulus erkiteken Perpulungen Korinti “kepentaren doni ras kesenangen doni siiayakina”. Jadi memang Paulus agak kecewa, sebab kepeken perpulungen lenga berubah. Seharuna perpulungen kenca ngaloken Kristus, lit sada perubahan ibas kegeluhenna. Biak-biak daging (doni) lanai erkuasa ibas kegeluhenna, tapi enda lit denga.
3. Memang lit sada perbedaan ibas gaya ngelai antara Paulus ras Apolos, tapi labo berarti gaya e erbahanca perpulungen nggeluh ibas kelompok-kelompok, lang. Harus siteh Paulus ras Apolos eme serayan Tuhan, janah erdahin sue ras “talenta” siibereken Tuhan gelah kiniteken perpulungen jadi dewasa.
4. Guna ngambarken dahin masing-masing, Paulus makeken gambaran dunia pertanian, ija Paulus si nuan janah Apolos siniramsa, enda ate Paulus gelah perpulungen meteh maka subuk Paulus ras Apolos eme sada kesatuan ibas pelayanan. Jadi amin gia Paulus leben reh asangken Apolos, labo berarti kai sienggo isuanken Paulus bene, lang, kerina enda lebih bertumbuh ibas pelayanan Apolos, emaka ula min perpulungen mebeda-bedaken kerina enda, terlebih nggeluh ibas sada golongan.
5. Penekanan Paulus sipaling inti eme Dibata. Sebab penggejapen Paulus pertumbuhen perpulungen e erkiteken Dibata, Dibata sipeturahsa, labo Paulus ntah pe Apolos. Paulus ras Apolos eme sada aron, emaka la lit siganjang terukan ibas ia duana. Emaka situhuna la lit ertina pendahin Paulus ras Apolos adi Dibata la erperan.

THEOLOGIA NASKAH
- Perpulungen Korinti lenga dewasa kinitekenna, inemenna susu denga, lenga ngasup nakan keras.
- Perpulungen Korinti nggeluh rikutken biak doni denga.
- Paulun sinuanca, Apolos siniramsa, tapi Dibata sipeturahsa.

APLIKASI
Adi kita ngerana kerna gereja maka kita ngerana kerna persadan, emaka biak kegeluhen ibas gereja eme nggeluh ras-ras, labo nggeluh sisada-sisada. Kegeluhen nggeluh ras-ras lebih banci mbue terdahiken ras mpercepat dahin-dahin gereja tersehi. Emaka kegeluhen sisada-sisada (egois), simementingken diri sendiri ntah pe kelompok harus iambengken. Sebab kegeluhen sibage peturah perpecahen ibas persadan gereja. Situhuna banci kita berkompetisi, tapi berkompetisi lah ku simehuli, guna mpercepat terlaksanana dahin Tuhan.
Kegeluhen bersinergi (kegiatan yang dilakukan secara bersama-sama), e harus nggeluh ibas gereja, sebab ibas pelayanan gereja banci sikataken kerina berhubungen. Emaka subuk seksi-seksi silit, bagepe kategorial ras perpulungen jabu-jabu harus lit kerja sama ibas pelayanan. Memang guna sienda ibas gerejanta lit sigelarna rapat kordinasi. Rapat kordinasi enda ibahan ibas tep-tep runggun sada tahun empat kali (telu bulan sekali). Tapi enda terjeng sikundul ibas struktur saja. Uga ka si la kundul ibas struktur (anggota perpulungen). Perpulungen pe harus terlibat aktif ibas pelayanan gereja. Perpulungen ibas kordinasi runggun gereja (BP. Runggun) harus ikut muat bagin ibas pelayanen gereja. Tapi siidah genduari keterlibatan anggota perpulungen khususna gotong royong enggo kurang. Janah lit deba dahin e enggo iupahken saja. Memang enda terjadi erkiteken kesibukenta masing-masing, bagepe lit ka simemanfaatken hari-hari khusus (libur) guna keluarga, tapi lit ka deba si la nggit ikut gotong royong. Janah lit ka deba erkiteken engo urak semangatna ikut bas gotong roroyong (semangat kebersamaan) erkiteken “igilas” zaman enda. Emaka semangat gotong royong banci nggeluh ras meningkat adi sipahami gereja e kai, gereja e eme persadan kalak sitek, janah fungsina eme nggeluh ibas persadan ras ingan nehken berita si meriah. Emaka ibas kita nggeluh selaku gereja simperdiateken dahin-dahin Tuhan maka kita ngaloken pasu-pasu idur Dibata nari. Emaka marilah kita selaku gereja, mperdiateken kerna kegeluhen bergereja. Melala kal dahin-dahin gereja sibanci i gotong royongken iantaranya eme kebersihen gereja, kegeluhen bersosial (adi lit kalak mate), rsd.

Pdt. Steven Kumenit, STh.,M.Min.